قازاقستاندا «ۆەيپتەردىڭ» تارالۋىنا توسقاۋىل قويۋ ءۇشىن ناقتى شارالار قابىلدانادى. بۇل تۋرالى پرەزيدەنت قاسىم-جومارت توقاەۆ ايتتى، دەپ حابارلايدى «ادىرنا» ءتىلشىسى اقورداعا سىلتەمە جاساپ.
«مەن بىلتىرعى قۇرىلتايدا بالالار مەن جاستاردىڭ دەنساۋلىعىنا، ياعني تۇتاس ۇلتتىڭ بولاشاعىنا وراسان زور زيان كەلتىرىپ جاتقان «ۆەيپتەردىڭ» تارالۋىنا توسقاۋىل قويۋ ءۇشىن ناقتى شارالار قابىلداۋ قاجەتتىگىن ايتتىم. قازىر پارلامەنتتە ۆەيپتەردى ەلگە اكەلگەن، ونى وندىرگەن جانە تاراتقان ادامداردى قىلمىستىق جاۋاپكەرشىلىككە تارتۋدى كوزدەيتىن زاڭ جوباسى قارالىپ جاتىر. بۇل قادام بۇگىندە سانگە اينالعان وسى ءبىر قاۋىپتى كەسەلدىڭ تارالۋىن ەداۋىر شەكتەپ، بەتىن قايتاراتىنىنا سەنىمدىمىن.
سونداي-اق اقپارات قۇرالدارى ارقىلى جان-جاقتى ءتۇسىندىرۋ جۇمىسى جۇرگىزىلۋگە ءتيىس. بۇل – ۇلت ساۋلىعىنا دا، ەلىمىزدىڭ ابىروي-بەدەلىنە دە كەسىرىن تيگىزەتىن ادەت. ءبىز وركەنيەتتى ەل بولامىز دەسەك، ودان تولىق ارىلۋىمىز كەرەك»،—دەدى باسشى.
قاسىم-جومارت توقاەۆ تاعى ءبىر قاۋىپتى كەسەل – لۋدومانياعا دا توقتالدى.
«كەيبىر مالىمەتتەرگە قاراساق، 400 مىڭعا جۋىق ازامات – بۋكمەكەرلىك كەڭسەلەر مەن كازينولاردىڭ تۇراقتى كليەنتى. بۇل – تۇتاس ءبىر قالانىڭ حالىق سانىنا پارا-پار كورسەتكىش. شىن مانىندە، لۋدومانيا – بەيبىت كۇندە ەلدىڭ شىرقىن بۇزىپ جاتقان قاتەر. سونىڭ كەسىرىنەن تالاي شاڭىراق شايقالدى. تالاي ازامات زاڭ بۇزىپ، قىلمىسقا ۇرىندى. قۇمار ويىن ءۇشىن قارىزعا باتىپ، وزىنە قول جۇمساعان جاندار تۋرالى حابارلار، وكىنىشكە قاراي، كۇن سايىن تاراپ جاتادى. بۇل دەرت جاس ۇرپاققا وتە ۇلكەن زيان كەلتىرەدى. ونلاين-ويىندار بالالاردىڭ كۇندەلىكتى ەرمەگىنە اينالىپ بارادى. قۇزىرلى ورگاندار بىلتىر ينتەرنەت-كازينونىڭ بەلگىسى بار 4 مىڭنان استام سايتتى بۇعاتتادى»،—دەدى پرەزيدەنت.
