قازاقستاندا پارا بەرۋ تۋرالى ۋادە ەندى رەسمي تۇردە قىلمىستىق قۇقىقبۇزۋشىلىق بولىپ سانالادى. بۇل نورما سىبايلاس جەمقورلىققا قارسى ءىس-قيمىل تۋرالى زاڭعا ەنگىزىلگەن تۇزەتۋلەردە قاراستىرىلعان. اتالعان زاڭعا 12 ماۋسىم كۇنى پرەزيدەنت قاسىم-جومارت توقاەۆ قول قويعان، دەپ حابارلايدى "ادىرنا"
كۋرسيۆ.kz مالىمەتىنشە، قۇجات پارانى ۋادە ەتۋ، ۇسىنۋ جانە تالاپ ەتۋ ارەكەتتەرىن قىلمىستىق جاۋاپكەرشىلىككە جاتقىزادى. حالىقارالىق تاجىريبە مۇنداي نورمالار جەمقورلىققا توزبەۋشىلىك مادەنيەتىن قالىپتاستىرىپ، قىلمىستىڭ سالدار كەلتىرمەي تۇرىپ-اق الدىن الۋعا مۇمكىندىك بەرەتىنىن كورسەتەدى.
جاڭا ەرەجەلەر 2027 جىلدىڭ 1 قاڭتارىنان باستاپ كۇشىنە ەنەدى.
تۇرمىستىق جەمقورلىقپەن كۇرەس اياسىندا اۋرۋحانالار، مەكتەپتەر، ۋنيۆەرسيتەتتەر، بانكتەر جانە كوممۋنالدىق قىزمەتتەر قىزمەتكەرلەرىنىڭ ءىرى كولەمدە زاڭسىز سىياقى الۋى نەمەسە بوپسالاۋ ارقىلى الىنعان قاراجاتقا قاتىستى جاۋاپكەرشىلىك كۇشەيتىلدى.
سونداي-اق وسىنداي ۇيىم قىزمەتكەرلەرىنە زاڭسىز سىياقى بەرۋ ءۇشىن دە قىلمىستىق جاۋاپكەرشىلىك ەنگىزىلدى. بۇدان بولەك، قىلمىستىق كودەكسكە زاڭسىز سىياقى الۋعا يتەرمەلەۋ (پروۆوكاتسيا) ءۇشىن جازا قاراستىراتىن نورما ەنگىزىلدى.
Tengrinews.kz حابارلاۋىنشا، جاڭا زاڭ اياسىندا مۇددەلەر قاقتىعىسىن الدىن الۋ جانە رەتتەۋ تەتىگى ەنگىزىلىپ، ونى بولدىرماۋ شارالارىن ورىنداماعانى ءۇشىن جاۋاپكەرشىلىك بەلگىلەنەدى.
قۇجات مەملەكەتتىك قىزمەتتەگى جاقىن تۋىستاردىڭ بىرگە جۇمىس ىستەۋىنە قاتىستى شەكتەۋلەردى دە كۇشەيتەدى. ەندى بۇل شەكتەۋلەر تىكەلەي باعىنىشتىلىق جاعدايلارىمەن قاتار، جاناما ىقپال، ىشكى باقىلاۋ جانە كادرلىق ىستەرگە قاتىسۋ جاعدايلارىنا دا قولدانىلادى. ءبىر ۆەدومستۆودا باسشىنىڭ جاقىن تۋىستارىنىڭ (سونىڭ ىشىندە جيەن، جەزدە، بالدىز جانە باسقا تۋىستار) بىرگە جۇمىس ىستەۋىنە تىيىم سالىنادى.
سونىمەن قاتار، مەملەكەتتىك قىزمەتشىلەر جۇمىسقا ورنالاسۋ كەزىندە جاقىن تۋىستارى تۋرالى مالىمەتتەردى اشۋعا مىندەتتى بولادى.
سوڭىندا، سىبايلاس جەمقورلىق قۇقىقبۇزۋشىلىقتارى ءۇشىن جەكە تۇلعالاردى اكىمشىلىك جاۋاپكەرشىلىككە تارتۋ مەرزىمى ءبىر جىلدان ءۇش جىلعا دەيىن ۇزارتىلدى.
