Qazaqstanda «veipterdıŋ» taraluyna tosqauyl qoiu üşın naqty şaralar qabyldanady. Būl turaly prezident Qasym-Jomart Toqaev aitty, dep habarlaidy «Adyrna» tılşısı Aqordaǧa sılteme jasap.
«Men byltyrǧy Qūryltaida balalar men jastardyŋ densaulyǧyna, iaǧni tūtas ūlttyŋ bolaşaǧyna orasan zor ziian keltırıp jatqan «veipterdıŋ» taraluyna tosqauyl qoiu üşın naqty şaralar qabyldau qajettıgın aittym. Qazır Parlamentte veipterdı elge äkelgen, ony öndırgen jäne taratqan adamdardy qylmystyq jauapkerşılıkke tartudy közdeitın zaŋ jobasy qaralyp jatyr. Būl qadam bügınde sänge ainalǧan osy bır qauıptı keseldıŋ taraluyn edäuır şektep, betın qaitaratynyna senımdımın.
Sondai-aq aqparat qūraldary arqyly jan-jaqty tüsındıru jūmysy jürgızıluge tiıs. Būl – ūlt saulyǧyna da, elımızdıŋ abyroi-bedelıne de kesırın tigızetın ädet. Bız örkeniettı el bolamyz desek, odan tolyq aryluymyz kerek»,—dedı basşy.
Qasym-Jomart Toqaev taǧy bır qauıptı kesel – ludomaniiaǧa da toqtaldy.
«Keibır mälımetterge qarasaq, 400 myŋǧa juyq azamat – bukmekerlık keŋseler men kazinolardyŋ tūraqty klientı. Būl – tūtas bır qalanyŋ halyq sanyna para-par körsetkış. Şyn mänınde, ludomaniia – beibıt künde eldıŋ şyrqyn būzyp jatqan qater. Sonyŋ kesırınen talai şaŋyraq şaiqaldy. Talai azamat zaŋ būzyp, qylmysqa ūryndy. Qūmar oiyn üşın qaryzǧa batyp, özıne qol jūmsaǧan jandar turaly habarlar, ökınışke qarai, kün saiyn tarap jatady. Būl dert jas ūrpaqqa öte ülken ziian keltıredı. Onlain-oiyndar balalardyŋ kündelıktı ermegıne ainalyp barady. Qūzyrly organdar byltyr internet-kazinonyŋ belgısı bar 4 myŋnan astam saitty būǧattady»,—dedı prezident.
