ماتەريالدىق ەمەس مادەني مۇرانى قورعاۋ جونىندەگى قازاقستاننىڭ ۇلتتىق كوميتەتى ۇسىنعان جوبا العاش رەت يۋنەسكو-نىڭ حالىقارالىق قورىنان قاراجات الدى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
ۇيىمنىڭ شتاب-پاتەرىندە ماتەريالدىق ەمەس مادەني مۇرانى قورعاۋ جونىندەگى ۇكىمەتارالىق كوميتەتتىڭ 19-سەسسياسى بيۋروسىنىڭ ءبىرىنشى وتىرىسى ءوتتى.
كەزدەسۋ بارىسىندا يۋنەسكو-نىڭ مەمم قورعاۋ قورىنان حالىقارالىق كومەك مەحانيزمى بويىنشا جوبالاردى قارجىلاندىرۋعا ءتورت ءوتىنىم قاراستىرىپ، قولداۋ تاپتى.
«ەلگە 99,6 مىڭ دوللار ءبولىندى. بۇل اقشا ماتەريالدىق ەمەس مادەني مۇرانىڭ ۇلتتىق ءتىزىمىن جاڭارتۋعا جۇمسالادى»،—دەپ جازدى ءسىم.
ايتا كەتەيىك، ماتەريالدىق ەمەس مادەني مۇرا نىساندارىنا قازاقشا كۇرەس، كۇي، جىرتقىش قۇستارمەن اڭشىلىق ونەرى، ناۋرىز، ءداستۇرلى اسىق ويىنى جانە باسقا دا كوپتەگەن ۇلتتىق ءداستۇر جاتادى.
