Qazaqstanda azamattardyń qaryz júktemesiniń ósýine jol bermeý úshin kredıtter boıynsha tólem merzimin keshiktirý 90 kúnnen asqan jaǵdaıda olarǵa kepilsiz tutynýshylyq kredıtter berýge tyıym salý jóninde norma engizý usynyldy, dep habarlaıdy "Adyrna" ulttyq portaly. Bul týraly Májilis depýtaty Únzıla Shapaq málimdedi.
«Problemalyq qaryzdary bar azamattardyń qaryz júktemesiniń ósýine jol bermeý úshin kredıtter boıynsha tólem merzimin keshiktirý 90 kúnnen asqan jaǵdaıda olarǵa kepilsiz tutynýshylyq kredıtter berýge tyıym salý jóninde norma engiziledi. Budan basqa, bankter men mıkroqarjy uıymdary úshin barlyq qoldanystaǵy (ótelmegen) tutynýshylyq kredıtter boıynsha tólem merzimin keshiktirý 90 kúnnen asqan soń syıaqy esepteýge tyıym salynady», - dedi Shapaq.
Onyń aıtýynsha, problemalyq kredıtterdi retteý rásimderin iske asyrý arqyly azamattardyń problemalyq bereshek deńgeıin azaıtý mańyzdy shara bolyp tabylady. Sońǵy jyldary bankter men mıkroqarjy uıymdary óz balanstaryn tazartý úshin jeke tulǵalardyń problemalyq kredıtterin aıtarlyqtaı jeńildikpen kollektorlarǵa berý praktıkasy qalyptasty. Sondyqtan da qaryz alýshylardyń merzimi ótken bereshekti retteý quqyqtaryn qorǵaý úshin bankter men mıkroqarjy uıymdarynyń azamattardyń kredıtterin tólem merzimi ótken kezden bastap 24 aıdan soń jáne kredıtor bereshekti retteý rásimderin júrgizgennen keıin ǵana kollektorlyq agenttikterge satýyna ruqsat berý usynylady.
«2024 jylǵy 1 qańtardaǵy jaǵdaı boıynsha elimizdiń 890 myń azamatynyń 382 mlrd. teńge somasyndaǵy qaryzdary kollektorlyq agenttikterge berilgen», - dedi Únzıla Shapaq.
Sonymen birge, buryn nesıeleri kollektorlyq agenttikterge berilgen qaryz alýshylardy qorǵaý úshin ınkassatorlardyń jeke tulǵalardan satyp alynǵan nesıeler boıynsha bereshegin retteý mindeti engizilýde. Sondaı-aq, kámeletke tolmaǵan balalary bar otbasylardy jylý maýsymynda jalǵyz baspanasynan shyǵarýǵa tyıym salynýda.
Sonymen qatar, zań jobasy nesıelik bereshekti óndirip alý kezinde qaryz alýshynyń bank shotynda saqtalatyn aqsha somasyn eń tómengi kúnkóris deńgeıiniń bir eseden eki esege deıin ulǵaıtady jáne bereshekti óteý jáne óndirip alý rásiminiń merzimin 18 aıdan 12 aıǵa deıin qysqartý kózdelýde.
