ءماجىلىس وتىرىسىندا جوعارى اۋديتورلىق پالاتانىڭ ەسەبىنەن كەيىن دەپۋتات ازات پەرۋاشەۆ قازاقستاننىڭ سىرتقى قارىزى رەكوردتىق دەڭگەيگە جەتكەنىن مالىمدەدى، دەپ حابارلايدى «ادىرنا» ءتىلشىسى.
«جىل سايىن جاڭا قارىزداردىڭ 36%-ى بۇرىن الىنعان مىندەتتەمەلەر بويىنشا ەسكى قارىزدى وتەۋگە جۇمسالىپ كەلەدى، ياعني «قارىزدى جاڭا قارىزبەن جابۋ» قاعيداسى جۇمىس ىستەيدى. 2025 جىلى مۇنداي قايتا قارجىلاندىرۋ كولەمى 51%-عا دەيىن ءوستى»، – دەدى دەپۋتات ازات پەرۋاشەۆ.
ونىڭ ايتۋىنشا، ۇلتتىق بانكتىڭ دەرەكتەرىنە سايكەس، 2025 جىلدىڭ سوڭىنا قاراي قازاقستاننىڭ سىرتقى قارىزى رەكوردتىق كورسەتكىشكە – شامامەن 182 ملرد اقش دوللارىنا جەتكەن.
«جىل ىشىندە سىرتقى قارىز كولەمى 10,4%-عا ارتتى. بۇل – سوڭعى 17 جىلداعى ەڭ جوعارى ءوسىم»، – دەپ حابارلادى دەپۋتات.
ەسكە سالا كەتەيىك، 2024 جىلى قازاقستاننىڭ سىرتقى قارىزى 164,7 ملرد دوللاردى قۇراعان بولاتىن. بۇل كورسەتكىش ەۋرازيالىق ەكونوميكالىق وداق ەلدەرى ىشىندە ەڭ جوعارى دەڭگەي بولعان.
