قازاقستان بيىل 5,7 ترلن تەڭگە قارىز الادى. بۇل تۋرالى قر پرەمەر-ءمينيسترى ءاليحان سمايىلوۆ قارجى مينيسترلىگىنىڭ كەڭەيتىلگەن القا ماجىلىسىندە ايتتى، دەپ حابارلايدى “ادىرنا” ۇلتتىق پورتالى.
«بيۋدجەت تاپشىلىعىن جابۋ مەن مەملەكەتتىك قارىزعا قىزمەت كورسەتۋ ءۇشىن قاراجات تارتۋ دا ماڭىزدى ماسەلە. بيىل بيۋدجەت تاپشىلىعىنىڭ ءجىو-گە قاتىناسى 2,7% نەمەسە 3,2 ترلن تەڭگە بولدى.
بۇرىن تارتىلعان قارىزداردى وتەۋ قاجەتتىلىگىن ەسكەرسەك، قارىز الۋ قاجەتتىلىگى 5,7 ترلن تەڭگەنى قۇرايدى. بۇل قوماقتى سوما»، - دەدى ءاليحان سمايىلوۆ.
ۇكىمەت باسشىسى بۇل باعىتتاعى قارىزدىڭ نەگىزگى بولىگى تەڭگەمەن جانە ىشكى نارىقتان الىنۋى كەرەكتىگىن ەسكەرتتى.
«تاپشىلىقتى نەگىزىنەن ۇلتتىق ۆاليۋتاداعى ىشكى قارىز الۋ ارقىلى قارجىلاندىرۋ قاجەت. وسىلايشا ءبىز ۆاليۋتالىق تاۋەكەلدەردى تەڭەستىرەمىز جانە ىشكى نارىقتى دامىتامىز.
وسىعان قاراماستان، بيۋدجەت تاپشىلىعىن قارجىلاندىرۋ ءۇشىن قاراجات تارتۋدىڭ بارلىق الەۋەتىن، ونىڭ ىشىندە سىرتقى نارىقتارعا شىعۋدى پايدالانۋ قاجەت.
وسى باعىتتاعى جۇمىس بيۋدجەتتى اتقارۋ كەزىندە كاسسالىق الشاقتىقتار بولمايتىنداي، ال بارلىق بورىشتىق ينديكاتورلار قاۋىپسىز دەڭگەيدە بولاتىنداي ەتىپ قۇرىلۋى ءتيىس»، - دەدى پرەمەر-مينيستر.
