ماسكەۋدە قازاقستان پرەمەر-ءمينيسترى ولجاس بەكتەنوۆ پەن رەسەي پرەمەر-ءمينيسترى ميحايل ميشۋستين كەلىسسوزدەر جۇرگىزدى. بۇل تۋرالى قر مينيسترلەر كابينەتىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
«قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ رەسەي فەدەراتسياسى ۇكىمەتىنىڭ توراعاسى ميحايل ءميشۋستيننىڭ شاقىرۋىمەن ماسكەۋگە جۇمىس ساپارىمەن باردى. كەلىسسوزدەر بارىسىندا ۇكىمەت باسشىلارى اعىمداعى ساۋدا-ەكونوميكالىق ىنتىماقتاستىق ماسەلەلەرىن جانە قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ پەن رەسەي فەدەراتسياسىنىڭ پرەزيدەنتى ۆلاديمير پۋتين اراسىندا جاسالعان كەلىسىمدەردىڭ ورىندالۋ بارىسى تۋرالى تالقىلادى»، — دەلىنگەن حابارلامادا.
مينيسترلەر كابينەتىنىڭ حابارلاۋىنشا، تاراپتار ساۋدا-ينۆەستيتسيالىق، ونەركاسىپتىك كووپەراتسيا، ەنەرگەتيكا، اۋىل شارۋاشىلىعى، ازاماتتىق اۆياتسيا، سونداي-اق ترانزيتتىك جانە كولىكتىك ىنتىماقتاستىق سالالارىندا بىرلەسكەن ءىس-قيمىلداردى بەلگىلەدى. سونىمەن قاتار، اقپاراتقا سايكەس، مادەني-اعارتۋ سالاسىنداعى ءوزارا ءىس-قيمىل ماسەلەلەرى تالقىلاندى.
«بەكتەنوۆ ونەركاسىپتىك كووپەراتسيا مەن ساۋدا-ساتتىق ءوزارا ءىس-قيمىلدى دامىتۋدىڭ وڭ قارقىنىن اتاپ ءوتتى. قازىرگى تاڭدا ەكى ەلدىڭ كاسىپكەرلىك سۋبەكتىلەرى جالپى قۇنى 26,5 ميلليارد دوللار بولاتىن 135 جوبانى جۇزەگە اسىرۋدا، سونىمەن قاتار ەكونوميكانىڭ نەگىزگى سالالارىندا، سونىڭ ىشىندە ماشينا جاساۋ، مەتاللۋرگيا جانە حيميا ونەركاسىبىندە جالپى قۇنى 14 ميلليارد دوللار بولاتىن 67 بىرلەسكەن جوبا ازىرلەنۋدە»، - دەلىنگەن حابارلامادا.
ءباسپاسوز قىزمەتىنىڭ مالىمەتىنشە، بىرلەسكەن كۇش-جىگەردىڭ ارقاسىندا 11 مىڭنان استام جۇمىس ورنى اشىلادى.
«ەلدەر اراسىنداعى قارىم-قاتىناستار ساۋدا-ەكونوميكالىق جانە مادەني ىنتىماقتاستىقتىڭ بارلىق سپەكترى بويىنشا جەمىستى دامىپ كەلەدى. ماڭىزدى باعىت – ونەركاسىپتىك كووپەراتسيا. بۇل تابىستى ەكىجاقتى ىنتىماقتاستىقتىڭ بەلگىسىنە اينالدى. ءبىزدىڭ ەلدەردىڭ ۇكىمەتتەرى ەلدەرىمىزدىڭ باسشىلارى قول جەتكىزگەن بارلىق ۋاعدالاستىقتاردى جۇزەگە اسىرۋ ءۇشىن بار كۇش-جىگەرىن سالادى»، - دەدى بەكتەنوۆ.
قازاقستان رەسپۋبليكاسى ۇكىمەتىنىڭ باسشىسى قازاقستان-رەسەي مەملەكەتتىك شەكاراسىنداعى وتكىزۋ پۋنكتتەرىن جاڭعىرتۋ جۇمىستارىن جەدەلدەتۋ جانە سينحرونداۋ قاجەتتىگىن اتاپ ءوتتى.
«كەزەڭدى جۇمىس اياسىندا 2027 جىلدىڭ سوڭىنا دەيىن جۇكتەمەنى ەسكەرە وتىرىپ انىقتالعان 30 باقىلاۋ-وتكىزۋ پۋنكتىنىڭ 29-ى قايتا جاڭعىرتىلادى. بۇل شارالار ءترانزيتتى جەڭىلدەتەدى جانە ورتاق شەكارانىڭ بۇكىل ۇزىندىعى بويىنشا وتكىزۋ قابىلەتىن ارتتىرادى. سونداي-اق حالىقارالىق «سولتۇستىك-وڭتۇستىك» ءدالىزىنىڭ الەۋەتىن كەڭەيتۋگە، قازاقستان-تۇركىمەنستان-يران تەمىرجول ۋچاسكەسىن قارقىندى پايدالانا وتىرىپ، كولىك ارتەرياسىن دامىتۋعا نازار اۋدارىلدى»، - دەپ تولىقتىردى ۇكىمەت.
قازاقستاندىق تاراپ سونىمەن قاتار اۋىل شارۋاشىلىعى ونىمدەرىن تەرەڭ وڭدەۋگە باسىمدىق بەرە وتىرىپ، اگرارلىق سەكتورداعى ىنتىماقتاستىقتى جانداندىرۋدىڭ پەرسپەكتيۆالى باعىتتارىن ايتتى.
ميشۋستين ءوز تاراپىنان مەملەكەت باسشىلارى دەڭگەيىندە قابىلدانعان بارلىق شەشىمدەر مەن ۋاعدالاستىقتاردى جۇزەگە اسىرۋ ءۇشىن بەلسەندى جۇمىس ىستەۋگە دايىن ەكەنىن ءبىلدىردى.
«ءبىز قازاقستانمەن ءوزارا قۇرمەت، سەنىم جانە ستراتەگيالىق ارىپتەستىك قاعيداتتارى نەگىزىندە قارىم-قاتىناستى نىعايتۋعا باسىمدىق بەرەمىز. ونەركاسىپ، ەنەرگەتيكا، مەديتسينا، كولىك ينفراقۇرىلىمى، تسيفرلىق تەحنولوگيالار سالالارىندا اۋقىمدى جوبالار جۇزەگە اسىرىلۋدا.
مەن رەسەي مەن قازاقستاننىڭ كولىك جانە لوگيستيكا سالاسىنداعى ىنتىماقتاستىق ءۇشىن وراسان زور الەۋەتى بار ەكەنىنە سەنىمدىمىن. ەۋرازياداعى ەڭ ماڭىزدى ترانزيتتىك باعىتتار ءبىزدىڭ ەلدەرىمىزدىڭ اۋماقتارى ارقىلى وتەدى»، - دەدى ميشۋستين.
تاراپتار وڭىرارالىق ىنتىماقتاستىقتى، سونداي-اق ءبىلىم بەرۋ سالاسىنداعى ءوزارا ءىس-قيمىلدى ودان ءارى نىعايتۋدىڭ ماڭىزدىلىعىن اتاپ ءوتتى.
«كەلىسسوزدەر ناتيجەسىندە ۇكىمەت باسشىلارى مەملەكەتارالىق قاتىناستاردىڭ بارلىق سپەكترى بويىنشا بىرلەسكەن جۇمىستىڭ جوعارى قارقىنىن ساقتاۋ نيەتىن راستادى»، - دەپ حابارلادى ۇكىمەت.
