جۋرناليستەر مەن ەرىكتىلەر اشىق دەرەككوزدەر ارقىلى رەسەيدىڭ ۋكرايناعا باسىپ كىرۋ كەزىندە قازا تاپقان كەمىندە 90 019 رەسەيلىك اسكەري قىزمەتكەردىڭ اتتارىن انىقتاعان. بۇل تۋرالى ۆۆس مەن «مەديازونا» زەرتتەدى، دەپ حابارلايدى “ادىرنا” ۇلتتىق پورتالى.
ونىڭ ىشىندە سوڭعى ەكى اپتادا 1964 ادام قازا تاپتى.
زەرتتەۋ اۆتورلارىنىڭ ايتۋىنشا، قازا تاپقانداردىڭ 23%-ى، ياعني ءار ءتورتىنشىسى، سوعىس باستالعاننان كەيىن عانا كەلىسىمشارتقا وتىرعاندار. 2023 جىلدىڭ قاراشا ايىندا بۇل كورسەتكىش 14%-دى قۇراعان.
قازا تاپقانداردىڭ جارتىسىنان كوبى سوعىس باستالعان كەزدە رەسەي اسكەرىمەن بايلانىسى بولماعان ادامدار. ولاردىڭ 17%-ى — تۇرمەدەگىلەر، 12%-ى — موبيليزاتسيالانعاندار. جۋرناليستەر ەرىكتىلەر دەپ تەرگەۋ نەمەسە سوتتىڭ باستالۋ ساتىسىندا قورعانىس مينيسترلىگىمەن كەلىسىمشارتقا قول قويعانداردى ەسەپتەگەن. مۇنداي ادامداردىڭ قازا بولۋى 2023 جىلدىڭ قازان ايىنان باستاپ كۇرت وسكەن. ەرىكتىلەر اراسىنداعى جالپى شىعىندار ەڭ جوعارى بولىپ وتىر — شامامەن 21 مىڭ ادام.
2024 جىلى قازا تاپقانداردىڭ ورتاشا جاسى، ناقتى دەرەكتەر بويىنشا، 36 جاستى قۇرادى. بۇل سوعىستىڭ العاشقى ەكى جىلىنداعىدان كوپ، دەپ اتاپ ءوتتى جۋرناليستەر.
قازا تاپقانداردىڭ 17%-ى كاسىبي اسكەريلەر. جۋرناليستەردىڭ تىزىمىندە توعىز گەنەرال مەن پودپولكوۆنيك دارەجەسىندەگى 500 اسكەري قىزمەتكەر بار. 2024 جىلى قازا تاپقانداردىڭ ورتاشا جاسى 36 جاس بولىپ وتىر، بۇل سوعىستىڭ العاشقى ەكى جىلىمەن سالىستىرعاندا جوعارى، دەپ كورسەتىلگەن زەرتتەۋدە.
ەڭ كوپ قازا تاپقاندار 24 قاڭتارعا دەيىن باشقۇرتستاننان تىركەلگەن. بۇل ءوڭىردىڭ بيلىك ورگاندارى مەن باق مالىمەتتەرى بويىنشا، بارلىعى 3932 ادام قازا تاپقان.
زەرتتەۋشىلەر قازا تاپقاندار ءتىزىمىن اشىق دەرەككوزدەردەن: باق، جەرگىلىكتى اكىمشىلىكتەردىڭ حابارلامالارى، الەۋمەتتىك جەلىلەردەگى تۋىستاردىڭ جازبالارى مەن زيراتتاردان الىنعان دەرەكتەر نەگىزىندە جۇرگىزۋدە.
ولار ناقتى شىعىندار الدەقايدا جوعارى بولۋى مۇمكىن ەكەنىن ايتادى، سەبەبى جۋرناليستەردىڭ تالداۋى ناقتى قازا تاپقانداردىڭ 45%-دان 65%-نا دەيىنگى مولشەرىن قامتۋى مۇمكىن.
رەسەي بيلىگى مايدانداعى شىعىندار تۋرالى رەسمي تۇردە حابارلامايدى. 2024 جىلدىڭ اقپانىندا ۋكراينا پرەزيدەنتى ۆلاديمير زەلەنسكي سوعىس باستالعالى بەرى 31 مىڭ ۋكراينالىق ساربازدىڭ قازا تاپقانىن حابارلادى. UALosses جوباسى اشىق دەرەكتەر نەگىزىندە سول كەزدە 42 مىڭ ادام قازا تاپقانىن، ال قازىر ۋكراين اسكەرىنىڭ شىعىنى 63,5 مىڭ ادامعا جەتكەنىن باعالاپ وتىر.
باتىس بارلاۋ ورگاندارىنىڭ مالىمەتتەرى بويىنشا، رەسەي مەن ۋكراينا تاراپىنان قازا تاپقاندار مەن جارالانعاندار سانى جۇزدەگەن مىڭدى قۇرايدى، جانە رەسەي شىعىندارىنىڭ كولەمى جوعارى دەپ باعالانۋدا. اقش پرەزيدەنتى دونالد ترامپ ۋكراينادا ءبىر ميلليونعا دەيىن رەسەيلىك اسكەري قىزمەتكەر مەن كەمىندە 700 مىڭ ۋكراينالىقتىڭ قازا تاپقانىن مالىمدەدى. الايدا، بۇل مالىمدەمەلەردىڭ دەرەككوزدەرى كورسەتىلمەگەن.
