Mäskeude Qazaqstan Premer-Ministrı Oljas Bektenov pen Resei Premer-Ministrı Mihail Mişustin kelıssözder jürgızdı. Būl turaly QR Ministrler Kabinetınıŋ baspasöz qyzmetı mälımdedı, dep habarlaidy “Adyrna” ūlttyq portaly.
«Qazaqstan Respublikasynyŋ Premer-Ministrı Oljas Bektenov Resei Federasiiasy Ükımetınıŋ Töraǧasy Mihail Mişustinnıŋ şaqyruymen Mäskeuge jūmys saparymen bardy. Kelıssözder barysynda ükımet basşylary aǧymdaǧy sauda-ekonomikalyq yntymaqtastyq mäselelerın jäne Qazaqstan Respublikasynyŋ Prezidentı Qasym-Jomart Toqaev pen Resei Federasiiasynyŋ Prezidentı Vladimir Putin arasynda jasalǧan kelısımderdıŋ oryndalu barysy turaly talqylady», — delıngen habarlamada.
Ministrler kabinetınıŋ habarlauynşa, taraptar sauda-investisiialyq, önerkäsıptık kooperasiia, energetika, auyl şaruaşylyǧy, azamattyq aviasiia, sondai-aq tranzittık jäne kölıktık yntymaqtastyq salalarynda bırlesken ıs-qimyldardy belgıledı. Sonymen qatar, aqparatqa säikes, mädeni-aǧartu salasyndaǧy özara ıs-qimyl mäselelerı talqylandy.
«Bektenov önerkäsıptık kooperasiia men sauda-sattyq özara ıs-qimyldy damytudyŋ oŋ qarqynyn atap öttı. Qazırgı taŋda ekı eldıŋ käsıpkerlık subektılerı jalpy qūny 26,5 milliard dollar bolatyn 135 jobany jüzege asyruda, sonymen qatar ekonomikanyŋ negızgı salalarynda, sonyŋ ışınde maşina jasau, metallurgiia jäne himiia önerkäsıbınde jalpy qūny 14 milliard dollar bolatyn 67 bırlesken joba äzırlenude», - delıngen habarlamada.
Baspasöz qyzmetınıŋ mälımetınşe, bırlesken küş-jıgerdıŋ arqasynda 11 myŋnan astam jūmys orny aşylady.
«Elder arasyndaǧy qarym-qatynastar sauda-ekonomikalyq jäne mädeni yntymaqtastyqtyŋ barlyq spektrı boiynşa jemıstı damyp keledı. Maŋyzdy baǧyt – önerkäsıptık kooperasiia. Būl tabysty ekıjaqty yntymaqtastyqtyŋ belgısıne ainaldy. Bızdıŋ elderdıŋ ükımetterı elderımızdıŋ basşylary qol jetkızgen barlyq uaǧdalastyqtardy jüzege asyru üşın bar küş-jıgerın salady», - dedı Bektenov.
Qazaqstan Respublikasy Ükımetınıŋ basşysy Qazaqstan-Resei memlekettık şekarasyndaǧy ötkızu punktterın jaŋǧyrtu jūmystaryn jedeldetu jäne sinhrondau qajettıgın atap öttı.
«Kezeŋdı jūmys aiasynda 2027 jyldyŋ soŋyna deiın jüktemenı eskere otyryp anyqtalǧan 30 baqylau-ötkızu punktınıŋ 29-y qaita jaŋǧyrtylady. Būl şaralar tranzittı jeŋıldetedı jäne ortaq şekaranyŋ bükıl ūzyndyǧy boiynşa ötkızu qabıletın arttyrady. Sondai-aq halyqaralyq «Soltüstık-Oŋtüstık» dälızınıŋ äleuetın keŋeituge, Qazaqstan-Türkımenstan-İran temırjol uchaskesın qarqyndy paidalana otyryp, kölık arteriiasyn damytuǧa nazar audaryldy», - dep tolyqtyrdy ükımet.
Qazaqstandyq tarap sonymen qatar auyl şaruaşylyǧy önımderın tereŋ öŋdeuge basymdyq bere otyryp, agrarlyq sektordaǧy yntymaqtastyqty jandandyrudyŋ perspektivaly baǧyttaryn aitty.
Mişustin öz tarapynan memleket basşylary deŋgeiınde qabyldanǧan barlyq şeşımder men uaǧdalastyqtardy jüzege asyru üşın belsendı jūmys ısteuge daiyn ekenın bıldırdı.
«Bız Qazaqstanmen özara qūrmet, senım jäne strategiialyq ärıptestık qaǧidattary negızınde qarym-qatynasty nyǧaituǧa basymdyq beremız. Önerkäsıp, energetika, medisina, kölık infraqūrylymy, sifrlyq tehnologiialar salalarynda auqymdy jobalar jüzege asyryluda.
Men Resei men Qazaqstannyŋ kölık jäne logistika salasyndaǧy yntymaqtastyq üşın orasan zor äleuetı bar ekenıne senımdımın. Euraziiadaǧy eŋ maŋyzdy tranzittık baǧyttar bızdıŋ elderımızdıŋ aumaqtary arqyly ötedı», - dedı Mişustin.
Taraptar öŋıraralyq yntymaqtastyqty, sondai-aq bılım beru salasyndaǧy özara ıs-qimyldy odan ärı nyǧaitudyŋ maŋyzdylyǧyn atap öttı.
«Kelıssözder nätijesınde ükımet basşylary memleketaralyq qatynastardyŋ barlyq spektrı boiynşa bırlesken jūmystyŋ joǧary qarqynyn saqtau nietın rastady», - dep habarlady ükımet.
