21 قاراشادا رەسەي پرەزيدەنتى ۆلاديمير پۋتين اقش-تىڭ جوسپارىنا قاتىستى تۇسىنىكتەمە بەردى، دەپ حابارلايدى "ادىرنا" ۇلتتىق پورتالى.
ءپۋتيننىڭ ايتۋىنشا، قازىرگى كۇنگى جوسپار انكوريدج كەزدەسۋىنەن بۇرىن تالقىلانعان.
«الياسكاداعى كەزدەسۋدەن كەيىن امەريكالىق تاراپتان بەلگىلى ءبىر ءۇزىلىس بولدى. بۇل، ءبىز بىلەمىز، ۋكراينا تاراپىنان ترامپ پرەزيدەنت ۇسىنعان بەيبىت جوسپاردان باس تارتۋىمەن بايلانىستى. سول سەبەپتى جاڭا، 28 تارماقتان تۇراتىن مودەرنيزيرلەنگەن جوسپار پايدا بولدى»، — دەدى ۆلاديمير پۋتين.
پرەزيدەنت جوسپار ءماتىنىنىڭ رەسەيدە بار ەكەنىن، بىراق ناقتى تالقىلاۋلارعا ءالى كىرمەگەنىن جەتكىزدى. ونىڭ پىكىرىنشە، بۇل اقش اكىمشىلىگىنە ۋكرايندىق تاراپتىڭ كەلىسىمىن ءالى الا الماۋىمەن بايلانىستى.
«ۋكراينا قارسى»، — دەپ اتاپ ءوتتى رەسەي پرەزيدەنتى.
سونداي-اق، ول رەسەي بەيبىت كەلىسسوزدەرگە دايىن ەكەنىن جانە ماسەلەلەردى كەلىسسوز ارقىلى شەشۋگە نيەتتى ەكەنىن ايتتى.
اقش-تاعى جاعدايعا توقتالساق، دونالد ترامپ جۋرناليستەرگە سوڭعى ۇسىنىستىڭ ۋكرايناعا ارنالعانى ما دەگەن سۇراققا «جوق» دەپ جاۋاپ بەردى. ول بەيبىتشىلىككە قول جەتكىزگىسى كەلەتىنىن جانە بۇل شەشىم بۇرىن قابىلدانۋى كەرەك بولعانىن ايتتى. ترامپ 27 قاراشانى ۋكراينا كەلىسۋى ءۇشىن ء«تيىستى ۋاقىت» دەپ اتادى.
Reuters جانە Washington Post مالىمەتىنە سايكەس، ەگەر ۋكراينا ۇسىنىستان باس تارتسا، ۆاشينگتون قارۋ جەتكىزۋدى توقتاتۋ جانە بارلاۋ اقپاراتىن بەرمەۋ ارقىلى قىسىم كورسەتۋى مۇمكىن. بۇل ۋكرايندىق تاراپتى الداعى ءداستۇرلى العىس كۇنىنە دەيىن كەلىسىمگە كەلۋگە ءماجبۇر ەتەدى دەپ حابارلاندى.
Reuters اقپاراتىنشا، ۋكراينا پرەزيدەنتى ۆلاديمير زەلەنسكي جوسپارى تۋرالى پىكىر ءبىلدىرىپ، كيەۆ «وتە كۇردەلى تاڭداۋ الدىندا» بولۋى مۇمكىن ەكەنىن اتاپ ءوتتى.
«28 تارماقتىق ۇسىنىستى قابىلداۋ نەمەسە ابىروي مەن نەگىزگى سەرىكتەستىگىن جوعالتۋ قاۋپى»، - دەلىنگەن اقپاراتتا.
