تۇركىستان وبلىسىنىڭ سايرام اۋدانىندا تروپيكالىق ايماقتا مەكەندەيتىن تۇيەقۇس وسىرىلە باستادى. بۇل تۋرالى 24.kz جاريالادى، دەپ حابارلايدى “ادىرنا” ۇلتتىق پورتالى.
اقپاراتقا سۇيەنسەك، تۇيەقۇس وسىرگەن جەرگىلىكتى شارۋا 2 جىل بۇرىن تۇيەقۇستىڭ 2 بالاپانىن ساتىپ الىپ، باعىپ كورگەن. كوبەيتە الارىندا كوزى جەتكەن سوڭ بىلتىر مەملەكەتتەن قايتارىمسىز گرانت الىپ، تاعى 3 باس قۇس الىپتى.
مانكەنت اۋىلىنىڭ تۇرعىنى سانجاربەك بولىسوۆتىڭ ۇيىندە تۇيەقۇستىڭ ءبىر جاسار بەس بالاپانى بار. شارۋا ولاردى قورادا ۇستايدى. كۇنىنە ءبىر رەت اۋلاعا شىعارىپ، سەرگىتەدى. ال اۋىل سىرتىنداعى شاعىن شارۋاشالىعىندا 4 باس انالىق پەن ءبىر باس اتالىعىن باعىپ وتىر. بالاپان كەزىندە كۇتىمى جاقسى بولسا، تەز وسەدى. ءارى جەرگىلىكتى اۋا رايىنا بەيىم، سۋىققا ءتوزىمدى دەيدى.
"وتكەن جىلى 28-29 گرادۋس ايازعا دەيىن شىدادى. سول ايازدا وسى جەردە تۇردى. بيىل 17-18 گاردۋسقا دەيىن اياز كوتەرىلدى، جاقسى. ال ىستىققا شىدامدى. بىزگە جاڭالىق بولىپ تۇرعانى ەندى ۇيرەنىپ جاتىرمىز. قانداي ەرەكشەلىگى بار، قانداي قيىندىعى بار. جولعا قويىپ الساق ءبىز ءۇشىن قيىن بولمايدى", - دەيدى كاسىپكەر سانجاربەك بولىسوۆ.
كاسىپكەردىڭ ايتۋىنشا، تۇيەقۇستىڭ بويى 2-3 مەترگە جەتەدى. اتالىعىنىڭ سالماعى 140-150 كەلى بولادى. ءاربىرى 100 كەلىگە دەيىن ەت بەرەدى. جەرگىلىكتى مەيرامحانالار كەلىسىن 4 مىڭ تەڭگەدەن الۋعا دايىن دەيدى. ەتى قان قىسىمى جانە قانت ديابەتىمەن اۋىراتىندار ءۇشىن تاپسىرماس ەم. ال تەرىسىن اياق كيىم، سومكە جاساۋعا پايدالانادى. تۇيەقۇس 60-70 جىل ءومىر سۇرەدى. جىلىنا 45-50-گە دەيىن جۇمىرتقالايدى.
سانجاربەكتىڭ ەندىگى ارمانى ونى كوبەيتىپ، اۋىلدا، اۋداندا دامىتۋ. كادىمگى قوي، جىلقى باققانداي حالىققا ۇيرەتۋ. كەلەشەكتە ءار ۇيدە بولسا، ەكسپورتقا شىعارۋ.
ويتكەنى بۇنىڭ ىشىندەگى مايى قىمبات تۇرادى ەكەن. كوسمەتولوگيادا، كۇيىك شالعان كەزدە پايدالانادى ەكەن. ءجۇز گرامم مايى 10 مىڭ تەڭگە تۇرادى. كەشە عانا ءبىز بىرەۋىن بورداقىلاپ سويىپ كوردىك، 3 ليتر ماي الدىق. ول ءوزىنىڭ 1 جىل جەيتىن جەم-ءشوبىنىڭ اقشاسىن اقتايدىي، - دەيدى كاسىپكەر.
