تۇركىستان وبلىسى كەنتاۋ قالاسىندا 1 قاڭتارعا قاراعان ءتۇنى ءورت شىعىپ، ءبىر ادام قازا تاپتى، دەپ حابارلايدى "ادىرنا" ۇلتتىق پورتالى.
الدىن الا مالىمەتكە سايكەس، تۇرعىن ءۇيدىڭ ءبىرىنشى قاباتىندا ورنالاسقان قوعامدىق تاماقتانۋ ورنىندا گاز-اۋا قوسپاسى جارىلعان. سالدارىنان اسپاز بولىپ جۇمىس ىستەگەن 18 جاستاعى قىز وقيعا ورنىندا كوز جۇمدى.
سونداي-اق تاعى ءتورت ادام ءتۇرلى جاراقاتپەن اۋرۋحاناعا جەتكىزىلدى. دارىگەرلەردىڭ ايتۋىنشا، ولاردىڭ ەكەۋىنىڭ جاعدايى اۋىر، قازىر جانساقتاۋ بولىمىندە ەم قابىلداپ جاتىر.
وقيعا ورنىنا تۇركىستان وبلىسىنىڭ اكىمى نۇرلان كوشەروۆ بارىپ، شۇعىل جيىن وتكىزدى. ايماق باسشىسى جاعدايدى جەكە باقىلاۋىنا العان. قازىرگى تاڭدا وقيعا ورنىندا جەدەل شتاب جۇمىس ىستەپ جاتىر.
اتالعان فاكتى بويىنشا تەرگەۋ باستالىپ، قىلمىستىق ءىس قوزعالدى.
ۇقساس جاڭالىقتار
