كوكجيەگىڭىزدى كەڭەيتىپ قانا قويماي، ءتىل ۇيرەتىپ شىعاتىن كىتاپ

158

27 ماۋسىم كۇنى قر ۇلتتىق كىتاپحاناسىندا جۋرناليست شىڭعىس مۇقاننىڭ «كوشباسشىلىق» جانە ورىس تىلىندەگى «ليدەرستۆو» كىتاپتارىنىڭ تۇساۋكەسەرى ءوتتى. تۇساۋكەسەردى جاناربەك ءاشىمجان جۇرگىزدى. ودان كەيىن ۇلتتىق كىتاپحانانىڭ ديرەكتورى باقىتجامال وسپانوۆا ءسوز الىپ، جاڭا كىتاپتىڭ شىعۋىمەن جانە الداعى جۋرناليستەر كۇنىمەن قۇتتىقتادى. سودان سوڭ قر پرەزيدەنتىنىڭ كەڭەسشىسى ماقسات ىسقاقوۆ، كىتاپ رەداكتورلارى تۇرىسبەك ساۋكەتاي مەن ريزا يساەۆا، رەجيسسەرلەر ساتىبالدى نارىمبەتوۆ پەن سەرگەي ءازىموۆ، الماتى قالاسىنىڭ باس يمامى ەركىنبەك قاجى ءسوز سويلەپ، كوشباسشىلىق تۋرالى ۇلتتىق ۇعىمداردى تارقاتىپ، رۋحاني اڭگىمەلەر ايتتى.

بۇل جيناققا كوشباسشىلىق تۋرالى الەمدىك سۇرانىسقا يە ەڭ ايتۋلى يدەيالار ەكەن. اۆتور امەريكانىڭ گارۆارد ۋنيۆەرسيتەتىندە وقىپ جۇرگەندە نەبىر كەرەمەت كىتاپتاردى وقىعاندىعىن، سول يدەيالاردى قازاقشاعا اۋدارىپ، قازاق وقىرماندارىنا تارتۋ ەتۋدى ماقسات ەتكەن.
«مازمۇنداما» جوباسى اياسىندا جارىققا كورگەن كىتاپتىڭ ارقالاعان جۇگى از ەمەس. مازمۇنداما دەگەنىمىز – كىتاپتىڭ باستى يدەيالارىنا قىسقاشا شولۋ. ۋاقىت سىنىنان ءوتىپ، ادامزات ويىنىڭ التىن قازىناسىنا اينالعان تاڭداۋلى تۋىندىلاردىڭ قايماعى.
«كوشباسشىلىق» كىتابى ليدەرلىكتەن باستالىپ، مەنەدجمەنت، تۇلعالىق ءوسۋ، دەنساۋلىق، بالا تاربيەسىمەن جالعاسادى. بۇل كىتاپتى وقىعان ادام كوكجيەگىن كەڭەيتىپ عانا قويماي، ءتىل ۇيرەنىپ شىعادى. سەبەبى، كىتاپتا مىڭنان اسا اعىلشىن مەن ورىس سوزدەرىن كەزدەستىرەسىز. دەمەك، سوزدىك قورىڭىز مولايادى. وقىرماندار وزدەرىنىڭ كوپتەگەن سۇراقتارىنا جاۋاپ تابادى. ەندەشە، «مازمۇنداما» بويىنشا جارىق كورگەن كىتاپتاردى پاراقتاۋدان كەش قالماڭىز!

ەلەنورا ءامىر

"ادىرنا" ۇلتتىق پورتالى

پىكىرلەر