1938 جىلعى اقپاننىڭ 25-ىنە اۋعان ءتۇنى الماتىدا سوۆەت جەندەتتەرى قاماۋداعى 39 ادامدى ءبىر دەمدە اتتى. ولاردىڭ 14-ءى – ساكەن سەيفۋللين، تەمىربەك جۇرگەنوۆ ءتارىزدى سوۆەتتىك قازاقستان ۇكىمەتىنىڭ مۇشەلەرى ەدى…
بۇل كۇنى اتىلعانداردىڭ تىزىمىندە قازاقتىڭ العاشقى جوعارى ءبىلىمدى اسكەري دارىگەرلەرىنىڭ جانە قازاقستانداعى تاريح عىلىمىنىڭ نەگىزىن قالاۋشىلاردىڭ ءبىرى، «قازاقستان تاريحى» اتتى كەشەندى عىلىمي ەڭبەكتىڭ اۆتورى، سانجار اسپاندياروۆ تا بار. ول 1938 جىلى 49 جاسىندا اتىلعان.
ال اقىن، قوعام، مەملەكەت قايراتكەرى، جازۋشى ساكەن سەيفۋللين 1937 جىلى «ۇلتشىل بۋرجۋا» دەگەن ايىپپەن تۇتقىندالىپ، 1938 جىلى 25 اقپاندا الماتى نكۆد-سىنىڭ قابىرعاسىندا اتىلدى. اقىننىڭ ەسىمى ستالين قايتىس بولعاننان كەيىن عانا، 1957 جىلى اقتالعان بولاتىن.
1938 جىلى 25 اقپاندا ادامداردى توپتاپ اتۋ ناۋقانى باستالعان. اتاپ ايتساق، 25 اقپاندا س.سەيفۋللين، س.اسفەندياروۆ، ت.جۇرگەنوۆ، س.مەڭدەشەۆ، ج.سادۋاقاسوۆ جانە باسقالارى بار 39 ادامدى; 26 اقپاندا 37 ادامدى، ونىڭ ىشىندە ءى.جانسۇگىروۆ، ج.شانين جانە ت.ب. قوعام قايراتكەرلەرى بار. 27 اقپاندا - 41 ادام، 28 اقپاندا - 40 ادام جانە ت.ب. بۇل ءتىزىم وسىلاي 14 ناۋرىزعا دەيىن جالعاسقان.
25 اقپاندا اتىلعان 39 ادام قاتارىندا ازاتتىق كۇرەسكەرلەرى، سوۆەت وكىمەتىنىڭ مەملەكەت، عىلىم، مادەنيەت، ادەبيەت قايراتكەرلەرى سانجار اسفەندياروۆ، عابدولحاكىم بوكەيحانوۆ، شاكىر ديۆەەۆ، سۇلەيمەن ەسقاراەۆ، تەل جامانمۇرىنوۆ، قۇدايبەرگەن جۇبانوۆ، تەمىربەك جۇرگەنوۆ، ۇزاقباي قۇلىمبەتوۆ، ءىزمۇحان قۇرامىسوۆ، سەيىتقالي مەڭدەشەۆ، ءىلياس مولداجانوۆ، حاسەن نۇرمۇحامەدوۆ، قابىلبەك سارىمولداەۆ، جانايدار سادۋاقاسوۆ، ساكەن سەيفۋللين، جاعىپار سۇلتانبەكوۆ، نىعمەتوللا سىرعابەكوۆ، قايسار ءتاشتيتوۆ، عابباس توعجانوۆ، ميراسبەك تولەپوۆ، زەينوللا تورەعوجين شەيىت بولدى.
ايتا كەتەيىك، وتكەن جىلدىڭ قازان ايىندا جازۋشى ساكەن سەيفۋللين بەينەلەنگەن كادردى جاريالاعان بولاتىنبىز. بۇل كادرلار 1935 جىلى قازاق اۆتونومياسىنىڭ قۇرىلعانىنا 15 جىل تولۋىنا وراي تۇسىرىلگەن.
“ادىرنا” ۇلتتىق پورتالى
