1938 jylǧy aqpannyŋ 25-ıne auǧan tünı Almatyda sovet jendetterı qamaudaǧy 39 adamdy bır demde atty. Olardyŋ 14-ı – Säken Seifullin, Temırbek Jürgenov tärızdı sovettık Qazaqstan ükımetınıŋ müşelerı edı…
Būl künı atylǧandardyŋ tızımınde qazaqtyŋ alǧaşqy joǧary bılımdı äskeri därıgerlerınıŋ jäne Qazaqstandaǧy tarih ǧylymynyŋ negızın qalauşylardyŋ bırı, «Qazaqstan tarihy» atty keşendı ǧylymi eŋbektıŋ avtory, Sanjar Aspandiiarov ta bar. Ol 1938 jyly 49 jasynda atylǧan. Al aqyn, qoǧam, memleket qairatkerı, jazuşy Säken Seifullin 1937 jyly «ūltşyl burjua» degen aiyppen tūtqyndalyp, 1938 jyly 25 aqpanda Almaty NKVD-synyŋ qabyrǧasynda atyldy. Aqynnyŋ esımı Stalin qaitys bolǧannan keiın ǧana, 1957 jyly aqtalǧan bolatyn. 1938 jyly 25 aqpanda adamdardy toptap atu nauqany bastalǧan. Atap aitsaq, 25 aqpanda S.Seifullin, S.Asfendiarov, T.Jürgenov, S.Meŋdeşev, J.Säduaqasov jäne basqalary bar 39 adamdy; 26 aqpanda 37 adamdy, onyŋ ışınde I.Jansügırov, J.Şanin jäne t.b. qoǧam qairatkerlerı bar. 27 aqpanda - 41 adam, 28 aqpanda - 40 adam jäne t.b. Būl tızım osylai 14 nauryzǧa deiın jalǧasqan. 25 aqpanda atylǧan 39 adam qatarynda azattyq küreskerlerı, sovet ökımetınıŋ memleket, ǧylym, mädeniet, ädebiet qairatkerlerı Sanjar Asfendiiarov, Ǧabdolhakım Bökeihanov, Şäkır Diveev, Süleimen Esqaraev, Tel Jamanmūrynov, Qūdaibergen Jūbanov, Temırbek Jürgenov, Ūzaqbai Qūlymbetov, Izmūhan Qūramysov, Seiıtqali Meŋdeşev, Iliias Moldajanov, Hasen Nūrmūhamedov, Qabylbek Sarymoldaev, Janaidar Saduaqasov, Säken Seifullin, Jaǧypar Sūltanbekov, Nyǧmetolla Syrǧabekov, Qaisar Täştitov, Ǧabbas Toǧjanov, Mirasbek Tölepov, Zeinolla Töreǧojin şeiıt boldy. Aita keteiık, ötken jyldyŋ qazan aiynda jazuşy Säken Seifullin beinelengen kadrdy jariialaǧan bolatynbyz. Būl kadrlar 1935 jyly Qazaq avtonomiiasynyŋ qūrylǧanyna 15 jyl toluyna orai tüsırılgen.“Adyrna” ūlttyq portaly
