اتىراۋ قالاسىنىڭ اكىمدىگىندە ءوز-وزىنە قول جۇمساماق بولعان اتىراۋلىق ازامات جاۋاپقا تارتىلدى، دەپ حابارلايدى “ادىرنا” ۇلتتىق پورتالى azh.kz سايتىنا سىلتەمە جاساپ.
وقيعا 1 اقپان كۇنى بولعان. بۇزاقىلىق جاساعان ازامات بۇل ارەكەتىن بارلىعى بولىپ جاتقان «زاڭسىزدىققا» نازار اۋدارسىن دەپ جاساعانىن ايتادى. اتىراۋ تۇرعىنى قالا اكىمدىگىندەگى بيۋروكراتيادان ۇزاق جىلداردان بەرى جەر تەلىمىن الا الماي جۇرگەنىن ايتىپ شاعىمدانعان. سودان سوڭ وسى ارەكەتكە بارعان. كەيىن ول بۇزاقىلىق بابى بويىنشا اكىمشىلىك جاۋاپكەرشىلىككە تارتىلدى.
«1 اقپاندا جەرگىلىكتى ۋاقىت بويىنشا ساعات 11:45-تە ازامات اتىراۋ قالاسىنىڭ اكىمدىگىنە كەلىپ، وزىنە بەنزين شاشىپ، ءوزىن ورتەپ جىبەرەمىن دەپ قورقىتىپ، شەشىلمەگەن جەر ماسەلەسىنە نارازىلىق بىلدىرگەن. وسى سەبەپتەرمەن ازامات قر اقبتك-ءنىڭ 434-بابىنىڭ («ۇساق بۇزاقىلىق») 1-تارماعى بويىنشا اكىمشىلىك جاۋاپكەرشىلىككە تارتىلدى»، - دەپ حابارلادى پوليتسيا.
اتىراۋ قالاسىنىڭ اكىمشىلىك قۇقىق بۇزۋشىلىق ىستەرى جونىندەگى مامانداندىرىلعان سوتى ايىپپۇل تۇرىندەگى اكىمشىلىك جازا قولدانۋ تۋرالى شەشىم قابىلدادى.
“ادىرنا” ۇلتتىق پورتالى
