جامبىل وبلىسىندا «سەرگەك» اۆتوماتتى باقىلاۋ كامەراسىن قاساقانا ىستەن شىعارعان ازامات اكىمشىلىك جاۋاپكەرشىلىككە تارتىلدى، دەپ حابارلايدى "ادىرنا" ۇلتتىق پورتالى.
بايزاق اۋداندىق سوتىنىڭ ءباسپاسوز قىزمەتىنىڭ مالىمەتىنشە، وقيعا 2025 جىلدىڭ جەلتوقسان ايىندا سارىكەمەر – تۇيمەكەنت – اقشولاق اۆتوجولىندا بولعان.
سوتتا انىقتالعانداي، ەر ادام پنەۆماتيكالىق مىلتىقپەن جول قوزعالىسى ەرەجەسىن بۇزۋدى اۆتوماتتى تۇردە تىركەيتىن «سەرگەك» كامەراسىنا وق اتقان.
سوت وتىرىسى بارىسىندا قۇقىق بۇزۋشى ءوز كىناسىن تولىق مويىنداپ، كەلتىرىلگەن شىعىننىڭ ءبىر بولىگىن وتەگەنىن مالىمدەگەن. الايدا جابىرلەنۋشى تاراپ زالالدىڭ تولىق كولەمدە وتەلمەگەنىن كورسەتكەن.
ناتيجەسىندە سوت قاۋلىسىمەن ازامات اكىمشىلىك قۇقىق بۇزۋشىلىق تۋرالى كودەكستىڭ 147-1-بابىنىڭ 1-بولىگى بويىنشا كىنالى دەپ تانىلىپ، وعان 196 مىڭ تەڭگە كولەمىندە ايىپپۇل سالىندى. سوت شەشىمى زاڭدى كۇشىنە ەندى.
