قازاقستاندىق كاسىبي ءبيشى، بىرنەشە حالىقارالىق بايقاۋلاردىڭ لاۋرەاتى اققانات سماعۇلوۆا گەرمانيادا وتكەن حالىقارالىق حورەوگرافيالىق جارىستا توپ جاردى، دەپ حابارلايدى "ادىرنا" ۇلتتىق پورتالى.
روزا باعلانوۆا اتىنداعى «قازاقكونتسەرت» مەملەكەتتىك اكادەميالىق كونتسەرتتىك ۇيىمى «گۇلدەر» ءانسامبلىنىڭ ءارتىسى اققانات سماعۇلوۆا 2024 جىلدىڭ 20 اقپانىندا گەرمانيادا وتكەن «TANZOLYMP» بەدەلدى حالىقارالىق حورەوگرافيالىق بايقاۋىنىڭ التىن مەدالىنە يە بولدى. بۇل تۋرالى ءبىرىنشى بولىپ ونەرپازدىڭ ۇستازى انۆارا سادىقوۆا الەۋمەتتىك جەلىدەگى پاراقشاسىندا سۇيىنشىلەدى.
«TANZOLYMP» فەستيۆال-بايقاۋى جىل سايىن وتكىزىلەتىن بەدەلدى حورەوگرافيالىق بايقاۋلاردىڭ ءبىرى.
اققانات سماعۇلوۆانى بايقاۋعا دايىنداعان «گۇلدەر» ءانسامبلىنىڭ باس بالەتمەيستەرى انۆارا سادىقوۆا جانە قازاق ۇلتتىق حورەوگرافيا اكادەمياسىنىڭ اعا وقىتۋشىسى المات شامشيەۆ. ولاردىڭ قويىلىمىندا اققانات بايقاۋدا «اققۋ» ءبيىن جانە «ەركە بالا» اتتى ەكى نومەرىن ۇسىندى.
800-دەن استام ونەرپاز باق سىناعان بايقاۋدا 34 قاتىسۋشى ىرىكتەۋدەن ءوتىپ، گالا-كونتسەرتتە ونەر كورسەتتى. ال اققانات سماعۇلوۆا — گالا-كونتسەرتتە "حالىق ءبيى" نوميناتسياسى بويىنشا ونەر كورسەتۋگە مۇمكىندىك العان جالعىز ونەرپاز.
ء"بىز ءۇشىن دۇنيەجۇزىلىك ارەنادا قازاقستاننىڭ نامىسىن قورعاۋ - ۇلكەن باقىت. قازىلار القاسىندا 21 ادام بولدى. تۇگەلدەي الەمنىڭ "سەن تۇر مەن اتايىن" دەگەن ونەرپازدارى مەن مىقتىلارى جيىلعان. وسىنداي بەدەلدى باسەكەدە اققانات جوعارى دەڭگەيدە ونەر كورسەتتى. ءوز بەدەلىن عانا ەمەس "گۇلدەر" ءانسامبلىنىڭ بەدەلىن، قازاق ەلىنىڭ ابىرويىن جەتكىلىكتى دەڭگەيدە قورعاپ شىقتى. ءبىز ونىمەن ماقتانامىز" دەدى انۆارا سادىقوۆا.
اققانات سماعۇلوۆا – قازاق ۇلتتىق حورەوگرافيا اكادەمياسىنىڭ تۇلەگى. اتالمىش وقۋ ورنىنىڭ باكالاۆرياتىن بىلتىر تامامداعان. ءتورت جىلداي «استانا بالەت» ءارتىسى رەتىندە جۇمىس ىستەپ، كەيىن «گۇلدەر» ءانسامبلىنىڭ قاتارىنا قوسىلدى.
"اققاناتىڭ العاشقى ۇستازى المات شەردارۇلى بولدى. اققاناتىڭ قاناتىن سامعاتىپ، شارا جيەنقۇلوۆا اتىنداعى V رەسپۋبليكالىق قازاق ءبيى بايقاۋىنا العاش قاتىستىرعان سول كىسى بولاتىن. كەيىن المات شەردارۇلىنىڭ شاقىرۋمەن مەن دە اققاناتپەن جۇمىس ىستەي باستادىم. وسىلاي ۇشەۋىمىز بىرگە جۇمىس ىستەپ كەلە جاتقانىمىزعا بيىل 5 جىل بولادى. ءتىپتى پاندەميا ۋاقىتىندا دا ءبىرتالاي ەڭبەكتەندىك. ونەرىمىزدى تاسپالاپ ءتۇرلى ونلاين بايقاۋلارعا قاتىسىپ جۇردىك. سول ۋاقىتتا 30-دان اسا حالىقارالىق بي بايقاۋىنىڭ جەڭىمپازى اتاندى. ءار بايقاۋ ءبىز ءۇشىن ءبىرىنشى رەت ساحناعا شىعىپ تۇرعانداي اسەر بەرەدى. بۇل جاي قارايتىن دۇنيە ەمەس. وتە تىڭعىلىقتى دايىندىقتى قاجەت ەتەدى. «TANZOLYMP»-ءتىڭ وزىنە 2 اي ۋاقىت دايىندالدىق. ءبىز جەتكەن جەتىستىكتەر ماڭداي تەردىڭ، ەرەن ەڭبەكتىڭ ارقاسى" دەدى انۆارا سادىقوۆا.
⠀
