ۆاشينگتوندا وتكەن بايقاۋدا قازاقستاندىق ينجەنەر ەرلان ءالىمحانوۆ ازىرلەگەن «MEGADRONE360» كوپفۋنكتسيالى درونى ۇزدىك وندىققا كىردى، دەپ حابارلايدى "ادىرنا" ۇلتتىق پورتالى.
شىعىس قازاقستان وبلىسىندا دۇنيەگە كەلگەن ماماننىڭ جوباسى اقش-تىڭ 200-دەن استام كومپانياسى ۇسىنعان جۇمىستار اراسىنان ىرىكتەلىپ، فيناليست اتاندى. درون ەكى جىل بويى امەريكادا قۇراستىرىلعان.
«MEGADRONE360» اپپاراتى مودۋلدىك قۇرىلىمىمەن جانە 360 گرادۋسقا تولىق اينالاتىن پلاتفورماسىمەن ەرەكشەلەنەدى. بۇل جۇيە دروندى اسكەري جانە ازاماتتىق ماقساتتاردا قولدانۋعا مۇمكىندىك بەرەدى. قۇرىلعىعا توتەنشە جاعدايلاردا كومەكتەسۋگە ارنالعان مودۋلدەر، جارىقتاندىرۋ پروجەكتورلارى، مەديكامەنت پەن جۇك جەتكىزۋ قۇرالدارى، قۇرعاق حيميالىق زاتتارمەن ءورت سوندىرەتىن مەحانيزم ورناتۋعا بولادى.
اۆتوردىڭ ايتۋىنشا، درون فەيەرۆەرك ىسكە قوسۋ، اۋىر كامەرا تاسىمالداۋ سياقتى سالالاردا دا قولدانۋعا ءتيىمدى. قازىرگى ۋاقىتتا قۇرىلعىنىڭ مۇمكىندىكتەرىن كەڭەيتۋ – ءموبيلدى كۇن ەلەكتر ستانتسياسىن جانە جەرمەن قوزعالاتىن روبوتتىق جۇيەنى ەنگىزۋ باعىتىندا جۇمىستار جۇرگىزىلۋدە.
"امەريكا – قارۋ-جاراق بويىنشا جەتەكشى ەل. ءبىزدىڭ جوبانىڭ توپ-10-دىققا ەنۋى – مەن ءۇشىن دە، قازاقستان ءۇشىن دە ۇلكەن جەتىستىك. پرەزەنتاتسيادا ءوزىمنىڭ قازاقستاننان ەكەنىمدى اتاپ ءوتتىم. بۇل – ءبىزدىڭ ەلدە دە جوعارى تەحنولوگيالار دامىپ جاتقانىن كورسەتەدى", – دەدى ەرلان ءالىمحانوۆ.
قازىر قازاقستاندىق كاليفورنيا شتاتىنداعى فريمونت قالاسىندا تۇرادى. سول جەردە 3D-ديزاينەر رەتىندە جۇمىس ىستەيدى.
