Qazaqstandyq käsıbi bişı, bırneşe halyqaralyq baiqaulardyŋ laureaty Aqqanat Smaǧūlova Germaniiada ötken halyqaralyq horeografiialyq jarysta top jardy, dep habarlaidy "Adyrna" ūlttyq portaly.
Roza Baǧlanova atyndaǧy «Qazaqkonsert» memlekettık akademiialyq konserttık ūiymy «Gülder» ansamblınıŋ ärtısı Aqqanat Smaǧūlova 2024 jyldyŋ 20 aqpanynda Germaniiada ötken «TANZOLYMP» bedeldı halyqaralyq horeografiialyq baiqauynyŋ altyn medalıne ie boldy. Būl turaly bırınşı bolyp önerpazdyŋ ūstazy Anvara Sadyqova äleumettık jelıdegı paraqşasynda süiınşıledı.
«TANZOLYMP» festival-baiqauy jyl saiyn ötkızıletın bedeldı horeografiialyq baiqaulardyŋ bırı.
Aqqanat Smaǧūlovany baiqauǧa daiyndaǧan «Gülder» ansamblınıŋ bas baletmeisterı Anvara Sadyqova jäne Qazaq Ūlttyq horeografiia akademiiasynyŋ aǧa oqytuşysy Almat Şämşiev. Olardyŋ qoiylymynda Aqqanat baiqauda «Aqqu» biın jäne «Erke bala» atty ekı nömerın ūsyndy.
800-den astam önerpaz baq synaǧan baiqauda 34 qatysuşy ırıkteuden ötıp, Gala-konsertte öner körsettı. Al Aqqanat Smaǧūlova — Gala-konsertte "Halyq biı" nominasiiasy boiynşa öner körsetuge mümkındık alǧan jalǧyz önerpaz.
"Bız üşın düniejüzılık arenada Qazaqstannyŋ namysyn qorǧau - ülken baqyt. Qazylar alqasynda 21 adam boldy. Tügeldei älemnıŋ "sen tūr men ataiyn" degen önerpazdary men myqtylary jiylǧan. Osyndai bedeldı bäsekede Aqqanat joǧary deŋgeide öner körsettı. Öz bedelın ǧana emes "Gülder" ansamblınıŋ bedelın, qazaq elınıŋ abyroiyn jetkılıktı deŋgeide qorǧap şyqty. Bız onymen maqtanamyz" dedı Anvara Sadyqova.
Aqqanat Smaǧūlova – Qazaq Ūlttyq horeografiia akademiiasynyŋ tülegı. Atalmyş oqu ornynyŋ bakalavriatyn byltyr tämämdaǧan. Tört jyldai «Astana Balet» ärtısı retınde jūmys ıstep, keiın «Gülder» ansamblınıŋ qataryna qosyldy.
"Aqqanatyŋ alǧaşqy ūstazy Almat Şerdarūly boldy. Aqqanatyŋ qanatyn samǧatyp, Şara Jienqūlova atyndaǧy V Respublikalyq qazaq biı baiqauyna alǧaş qatystyrǧan sol kısı bolatyn. Keiın Almat Şerdarūlynyŋ şaqyrumen men de Aqqanatpen jūmys ıstei bastadym. Osylai üşeuımız bırge jūmys ıstep kele jatqanymyzǧa biyl 5 jyl bolady. Tıptı pandemiia uaqytynda da bırtalai eŋbektendık. Önerımızdı taspalap türlı onlain baiqaularǧa qatysyp jürdık. Sol uaqytta 30-dan asa halyqaralyq bi baiqauynyŋ jeŋımpazy atandy. Är baiqau bız üşın bırınşı ret sahnaǧa şyǧyp tūrǧandai äser beredı. Būl jai qaraityn dünie emes. Öte tyŋǧylyqty daiyndyqty qajet etedı. «TANZOLYMP»-tıŋ özıne 2 ai uaqyt daiyndaldyq. Bız jetken jetıstıkter maŋdai terdıŋ, eren eŋbektıŋ arqasy" dedı Anvara Sadyqova.
⠀
Ūqsas jaŋalyqtar
