Ózbekstannyń Reseıdegi elshisi Botırjon Asadov Reseı Syrtqy ister mınıstrligine shaqyryldy. Oǵan Jýrnalıstıka jáne buqaralyq kommýnıkaııalar ýnıversıtetiniń rektory Sherzodhan Qudrathodjaevtyń málimdemesine baılanysty narazylyq bildirildi, dep habarlaıdy «Adyrna» tilshisi.
Buǵan deıin JOO basshysy Ózbekstanda turyp jatqan, biraq ózbek tilin bilmeıtin adamdardy «aqymaq nemese basqynshy» dep ataǵan edi. Ol 1966 jyly Keńes Odaǵynyń bir bóligi bolǵan Ózbekstanǵa Reseı, Belarýs jáne Ýkraınadan kóptegen tutqynnyń kelgenin atap ótti.
«Olar jer silkinisinen keıin Tashkentti qalpyna keltirýge kómektesýi tıis edi. Bul jumysshylardyń basym bóligi Ózbekstanda qaldy, alaıda memlekettik tildi úırengen joq»,—dedi ol.
Reseı Syrtqy ister mınıstrliginiń aıtýynsha, mundaı sózderdiń mazmuny men reńi eki eldi baılanystyratyn tereń strategııalyq seriktestik pen odaqtyq qatynastaryna múldem qaıshy keledi.
«KSRO quramynda bolǵan Ózbekstan óndirisi men aýyl sharýashylyǵyn, ǵylymy men mádenıetin qarqyndy damyta aldy. Búginde Ózbekstan táýelsiz memleket retinde Reseımen ózara teń dárejede, ózara qurmetke negizdelgen qatynas ornatty. Sondyqtan biz Sherzodhan Qudrathodjaevtyń sózin Ózbekstan halqy qoldamaıdy jáne ol sóz ózbekstandyqtardyń jalpy kóńil kúıin bildirmeıdi dep senemiz», - dep túsindirdi Reseı SIM.
