«قازاقستان تەمىر جولى» اق ءاليا نازارباەۆاعا قاتىستى كومپانيامەن Instant Payments تەمىرجول بيلەتتەرىن ساتۋ بويىنشا كەلىسىمدى بۇزدى. بۇل تۋرالى قتج باسقارما توراعاسىنىڭ ورىنباسارى ءانۋار احمەتجانوۆ مالىمدەدى، دەپ حابارلايدى “ادىرنا” ۇلتتىق پورتالى.
«1 جەلتوقساندا Instant كومپانياسىمەن كەلىسىم-شارت بۇزىلدى، قازىر «ءموبيلدى پورتال» جشس جۇمىس ىستەيدى. بۇل كومپانيا كونكۋرستىق نەگىزدە تاڭدالدى. ولار ەلەكتروندى بيلەت ساتۋ قىزمەتىن كورسەتەدى. ءبىز ولارعا ساتىلعان بيلەت ءۇشىن 29 تەڭگەدەن تولەيمىز»،- دەدى قتج باسقارما توراعاسىنىڭ ورىنباسارى ءانۋار احمەتجانوۆ.
ول بۇل جەكە كومپانيا ەكەنىن، ونىڭ قۇرىلتايشىلارى اراسىندا ءىرى تۇلعالار جوق ەكەنىن اتاپ ءوتتى.
«مەحانيزم بىردەي: ءبىز بيلەتتەردى ساتۋعا شىعارامىز، بۇل كومپانيا ولاردى اگەنتتەر ارقىلى ساتادى نەمەسە ونلاين ساتۋ ۇيىمداستىرادى» دەپ ءتۇسىندىردى ول.
«Instant Payments» جشس-مەن كەلىسىم 2014 جىلى جاسالعان جانە 2023 جىلدىڭ سوڭىنا دەيىن جارامدى. 2022 جىلدىڭ باسىنداعى Instant Payments كومپانياسىنىڭ نەگىزىن قالاۋشى تۇڭعىش پرەزيدەنت نۇرسۇلتان نازارباەۆتىڭ قىزى ءاليا نازارباەۆا بولدى.
ەستەرىڭىزگە سالا كەتەيىك، 2022 جىلعى قاڭتار وقيعاسىنان كەيىن «قازاقستان تەمىر جولى» ۇلتتىق كومپانياسى» اق (قتج) ەلەكتروندى تەمىرجول بيلەتتەرىن شىعارۋ جانە ساتۋمەن اينالىساتىن Instant Payments كومپانياسىمەن كەلىسىمشارتتى مەرزىمىنەن بۇرىن بۇزىپ جاتقانى بەلگىلى بولدى.
