الماتىداعى قايىرىمدىلىق مەكەمەسىندە مەكەمە قىزمەتكەرى 15 جاستاعى جاسوسپىرىمگە قول كوتەرىپ، سوققىعا جىققان. سوققىنىڭ سالدارىنان بالانىڭ ميىنا زاقىم كەلگەن، دەپ حابارلايدى “ادىرنا” ۇلتتىق پورتالى Almaty.tv تەلەارناسىنا سىلتەمە جاساپ.
كۋاگەرلەردىڭ سوزىنشە، بالا عيماراتتان قاشىپ شىعىپ، قار ۇستىندە جالاڭ اياق قاشا جونەلگەن.
“الدىمنان ءبىر ءجاسوسپىرىم شىعا كەلدى. جالاڭ اياق جىلاپ تۇر. قورىققاننان كولىكتىڭ ارتىنا تىعىلىپ قالدى. نە بولعانىن سۇرادىم. ول ماعان سوققىعا جىعىلعانىن ايتتى، – دەيدى وقيعا كۋاگەرى ابزال شاكەنوۆ.
كۋاگەرلەر بالاعا جەدەل كومەك بەرىپ، ءمان-جايدى پوليتسەيگە حابارلاعان. قازىر ءجاسوسپىرىم اۋرۋحانادا.
بالالار شۇعىل جاردەم ورتالىعى ناۋقاستاردى قولداۋ جانە ىشكى ساراپتاما قىزمەتىنىڭ باسشىسى كۇرمەتبەك توقتار بالانىڭ مەدرەسەدە ۇستاز ۇرعانىن، سالدارىنان باس ميىنىڭ شايقالۋى، كوز اينالاسىنىڭ گەماتوماسى دياگنوزى قويىلعانىن ايتادى.
جەتكەنشەكتىڭ ءوز سوزىنشە، وقيعا الدىندا ول ءوزىن جايسىز سەزىنە باستاعانىن جەتكىزگەن. الايدا مەكەمە قىزمەتكەرى بالانىڭ ءسوزىن “دۇعا” وقىماۋ ءۇشىن ايتىپ تۇرعان “سىلتاۋى” دەپ قابىلداپ، سەنبەگەن.
“مەن وقىمايمىن، كەتەمىن” دەسە، ۇستازى “بار كەتە بەر. قايدا كەتەسىڭ؟” دەگەن. ول جۇگىرىپ بارا جاتقان كەزدە، ۇستاپ قالىپ، بەتىنەن ۇرعان. بالانىڭ پسيحيكاسىنا دا اسەر ەتىپ تۇر. بالا شارشادى. شىنىن ايتقاندا، بەتى-اۋزىنىڭ ءبارى ءىسىپ تۇر، – دەپ بالانىع اناسى شاعىمىن ءبىلدىردى.
قازىردە پوليتسەيلەر ءمان-جايدى انىقتاۋعا كىرىستى.
ايتا كەتكەن ءجون، اتالمىش قايىرىمدىلىق مەكەمەسىنەن بۇعان دەيىن تىيىم سالىنعان ءدىني ادەبيەتتەر تابىلعان بولاتىن. وزگە وڭىرلەردە دە بار بۇل پانسيوناتتاردىڭ جالپى سانى 90-نان اسادى. قۇزىرلى ورگانداردىڭ مالىمەتىنشە، بۇل مەكەمەلەردىڭ بارلىعى ءبىر قايىرىمدىلىق قورىنا قارايدى.
“ادىرنا” ۇلتتىق پورتالى
