قىتايدا ءۇشىنشى جىل قاتارىنان حالىق سانىنىڭ ازايۋى بايقالادى. حوححوت بيلىگى تۋ كورسەتكىشىن قارجىلىق تولەمدەر مەن انالارعا تەگىن ءسۇت ارقىلى قولداۋعا شەشىم قابىلدادى. بۇل تۋرالى قىتايدىڭ مەملەكەتتىك پورتالى Zhōngguó Wǎng جازدى، دەپ حابارلايدى “ادىرنا” ۇلتتىق پورتالى.
حۋح-حوتو قالاسىندا اتا-انالار ءبىرىنشى بالا تۋعانى ءۇشىن ءبىر رەتتىك 10 مىڭ يۋان (قازىرگى باعام بويىنشا شامامەن 688 مىڭ تەڭگە) كولەمىندە قارجىلاي كومەك الادى. ەكىنشى بالا ءۇشىن جىل سايىن 10 مىڭ يۋان تولەنەدى، بالا بەس جاسقا تولعانشا، ال ءۇشىنشى بالا ءۇشىن تولەمدەر ون جاسقا دەيىن جالعاسادى. بۇل سومالار جەرگىلىكتى تۇرعىنداردىڭ ورتاشا تابىسىنان ايتارلىقتاي جوعارى.
سونىمەن قاتار، قالادا "انالارعا ارنالعان ءبىر شىنى ءسۇت" باعدارلاماسى ىسكە قوسىلدى. 1 ناۋرىزدان كەيىن بوسانعان ايەلدەر كۇن سايىن تەگىن ءسۇت الا الادى.
قىتاي ءۇشىنشى جىل قاتارىنان حالىق سانىنىڭ تومەندەۋىن تىركەپ وتىر. 2024 جىلى نەكە سانى رەكوردتىق تۇردە 20%-عا قىسقاردى. ساراپشىلار دەموگرافيالىق داعدارىستى 1980-2015 جىلدار ارالىعىندا ەنگىزىلگەن ء"بىر بالا" ساياساتىنىڭ سالدارىمەن، ۋربانيزاتسيامەن جانە بالالاردى تاربيەلەۋگە كەتەتىن جوعارى شىعىندارمەن بايلانىستىرادى. 2021 جىلى قىتاي وتباسىلارىنا ءۇش بالاعا دەيىن تۋعا رۇقسات بەرىلدى، بىراق بۇل جاعدايدى وزگەرتۋ ءۇشىن جەتكىلىكسىز بولدى.
ناۋرىز ايىنداعى پارلامەنت وتىرىسىندا قىتاي ۇكىمەتىنىڭ پرەمەر-ءمينيسترى لي تسيان جاڭا بالالار جاردەماقىلارى مەن تەگىن مەكتەپكە دەيىنگى ءبىلىم بەرۋ تۋرالى جاريالادى. ال 16 ناۋرىزدا جاريالانعان ەكونوميكانى ىنتالاندىرۋ جوسپارى بويىنشا، بۇكىل ەلدە بالالار بار وتباسىلاردى قولداۋ جۇيەسىن ەنگىزۋ قاجەتتىلىگى ايتىلدى.
