قازاقستان اۋماعىندا كيىك اۋلاۋ ۋاقىتشا توقتادى. بۇل تۋرالى پارلامەنت ماجىلىسىندە ورمان قورعاۋ تاقىرىبىنا ارنالعان ۇكىمەت ساعاتىنان كەيىن قازاقستان رەسپۋبليكاسىنىڭ ەكولوگيا جانە تابيعي رەسۋرستار ءمينيسترى ەرلان نىسانباەۆ مالىمدەدى، دەپ حابارلايدى “ادىرنا” ۇلتتىق پورتالى.
«وتاندىق عالىمدارمەن جانە حالىقارالىق ساراپشىلارمەن كەڭەسىپ، پىكىرتالاس جۇرگىزگەننەن كەيىن كيىك اتۋ توقتاتىلدى. سونىمەن قاتار، قازىر قىس كەزىندە دالادا ءجۇرۋ قيىندادى. سوندىقتان 10 اقپاننان باستاپ كيىكتەردىڭ سانىن رەتتەۋ پروتسەسىن توقتاتتىق»، - دەدى مينيستر ەرلان نىسانباەۆ.
ءمينيستردىڭ ايتۋىنشا، كيىك اۋلاۋ جۇمىستارى كەلەسى جىلى قايتا جالعاسادى.
«بىلتىرعى تاجىريبەنى ەسكەرە وتىرىپ، بيىل ەگجەي-تەگجەيلى ەسەپ جۇرگىزىلەدى. الدىن الا ەسەپتەۋ بويىنشا شامامەن 40 پايىز ءوسىم بولدى. جالپى، بىلتىرعى ءوسىمدى ەسەپكە العاندا تولدەيتىن ۋاقىتتا شامامەن 2,5-2,6 ميلليون باس بولادى. ءتىپتى پەسسيميستىك جاعدايدا دا بيىل ءوسىم بايقالادى»، - دەدى ول.
