قازاقستان مەن رەسەي «بايكال» كوپماقساتتى ۇشاق جاساۋ بويىنشا عىلىمي-زەرتتەۋ جانە تاجىريبەلىك-كونسترۋكتورلىق جۇمىستاردى ورىنداۋ تۋرالى كەلىسىمشارتقا قول قويدى، دەپ حابارلايدى “ادىرنا” ۇلتتىق پورتالى ەلوردا ينفو سايتىن سىلتەمە جاساپ.
كەلىسىمگە قازاقستاندىق اۆياتسيا يندۋسترياسىنىڭ باس ديرەكتورى دانيار امانگەلدين مەن «ورال ازاماتتىق اۆياتسيا زاۋىتى» اق باس ديرەكتورى ۆاديم بادەحا قول قويدى.
ءىس-شارا ماكس-2021 حالىقارالىق اۆياتسيالىق-عارىش سالونى الاڭىندا ءوتتى.
«بۇل كەلىسىمگە قول قويۋ – ءبىرىنشى كەزەكتە، قازاقستاننىڭ رەسەيمەن بىرلەسىپ اۆياتسيا سالاسىن دامىتۋ نيەتىن كورسەتەتىن قادام. سوڭعى جىلداردا رەسپۋبليكامىز قول جەتكىزگەن تەحنولوگيالىق دامۋ بىزگە وسى جوباعا ءوز ۇلەسىمىزدى قوسۋدا بەلگىلى ءبىر رولگە يە بولۋعا مۇمكىندىك بەرەدى»، – دەپ اتاپ ءوتتى د.امانگەلدين.
ءوز كەزەگىندە ۆ. بادەحا «بايكال» بۇل ورتالىق قالالاردان الىس ورنالاسقان جەرگىلىكتى جەلىلەردە جۇمىس ىستەۋگە ارنالعان جاڭا امبەباپ ايماقتىق ۇشاق ەكەنىن ايتتى. بۇعان دەيىن ماكس-2021 الاڭىندا العاش رەت «بايكال» لمس-901 كوپماقساتتى جەڭىل ۇشاعى تانىستىرىلدى. تۋربوبۇراندالى ۇشاقتىڭ كرەيسەرلىك جىلدامدىعى 300 كم/ساع، ۇشۋدىڭ ەڭ جوعارى قاشىقتىعى – 3000 كم، توپىراقتى جولاقتاردان ۇشۋدىڭ مينيمالدى قاشىقتىعى – 220 م.
ۇشاق كەمىندە 1500 كم قاشىقتىققا ەكى توننا جۇكتەمەنى جەتكىزۋگە قابىلەتتى بولادى. ونىڭ باعاسى شەتەلدىك باسەكەلەستەردەن 30-50%-عا تومەن بولادى دەلىنگەن.
