قازاقستاننىڭ اۋە كەڭىستىگىندە اپاتتىق دابىل سيگنالىن بەرگەن S7 Airlines اۋە كومپانياسىنىڭ جولاۋشىلار ۇشاعى ومبى اۋەجايىنا جوسپاردان تىس قوندى. بۇل تۋرالى اۋەجايدىڭ ءباسپاسوز قىزمەتى «ينتەرفاكس» اگەنتتىگىنە ايتتى، دەپ حابارلايدى «ادىرنا» ءتىلشىسى.
«ۇشاق ءساتتى قوندى، ەشقانداي وقىس وقيعا بولعان جوق»، – دەدى اۋەجاي وكىلى.
Boeing 737-800 ۇشاعى نوۆوسىبىردەن ماحاچكالاعا باعىت العان S7 7099 رەيسىن ورىنداعان.
بۇعان دەيىن اۋە كومپانياسىنىڭ وكىلى تەحنيكالىق اقاۋعا بايلانىستى ءنوۆوسىبىر – ماحاچكالا باعىتىنداعى S7 7099 رەيسىنىڭ ەكيپاجى ومبى قالاسىنداعى قوسالقى اۋەجايعا قونۋ تۋرالى شەشىم قابىلداعانىن راستاعان. ال بۇعان دەيىن توتەنشە جاعدايلار قىزمەتىنىڭ وكىلدەرى ۇشاقتىڭ ۇشۋ باعىتىن كۇرت وزگەرتىپ، رەسەي شەكاراسىنا قاراي بەت العانىن حابارلاعان. ۇشاق استانا ۋاقىتىمەن ساعات 13:08-دە ومبىعا قونعان.
Flightradar24 سەرۆيسىنىڭ مالىمەتىنشە، اۋە كەمەسىنىڭ ترانسپوندەرىندە توتەنشە جاعدايدى بىلدىرەتىن 7700 كودى ورناتىلعان.
7700 كودى - بۇل اۋە كەمەسىنىڭ ەكيپاجى بورتتاعى توتەنشە جاعداي تۋرالى ديسپەتچەرلەرگە حابارلاۋ ءۇشىن بورتتىق جاۋاپ بەرگىش ارقىلى جولدايتىن جالپى اپات كودى.
