الماتىدا لاي كوشكىنىنىڭ ۇيلەردى زاقىمداۋىنا قاتىستى قىلمىستىق ءىس قوزعالدى. بۇل تۋرالى قالا اكىمدىگىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«مەدەۋ اۋداندىق پوليتسيا ءبولىمى قىلمىستىق ءىس قوزعادى. ونى قۇزىرلى ورگاندار تەرگەيدى»،— دەلىنگەن حابارلامادا.
ەسكە سالايىق، 8 اقپاندا تاۋلى جەردە ورنالاسقان تاۋسامال ىقشاماۋدانىندا كوشكىن ءجۇرىپ، لاي توپىراق جەكە مەنشىك ءۇيدى جەرمەن-جەكسەن قىلعان ەدى. سالدارىنان وندا تۇرىپ جاتقان ءتورت ادام مەرت بولدى.
توتەنشە جاعدايلار مينيسترلىگىنىڭ اقپاراتىنا سۇيەنسەك، سۋىق سۋمەن جابدىقتاۋ قۇبىرىنىڭ جارىلۋى سالدارىنان توپىراق ىلعالدانىپ، كەيىن كولەمى 3200 تەكشە مەتر بولاتىن جىلجىما تۇسكەن. ەكى جەر ۇيگە، ونىڭ ىشىندە بىرەۋىنە ءىشىنارا زاقىم كەلگەن.
