رۋستام قاراعويشين «بايتەرەك» ۇلتتىق باسقارۋشى حولدينگىنىڭ باسشىسى بولىپ تاعايىندالدى. بۇل تۋرالى پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ ايتتى، دەپ حابارلايدى «ادىرنا» ءتىلشىسى.
رۋستام تيمۋرۇلى 1983 جىلى تۋعان. قازاقستاندىق مەنەدجمەنت، ەكونوميكا جانە بولجاۋ ينستيتۋتىن جانە حالىقارالىق بيزنەس اكادەمياسىن تامامداعان. ىسكەرلىك اكىمشىلەندىرۋ ماگيسترى دارەجەسىنە يە.
ەڭبەك جولىن 2004 جىلى «قازاقستاننىڭ دامۋ بانكى» اق-دا («بايتەرەك» ۇبح» اق ەنشىلەس ۇيىمى) باستادى، وندا جوبالىق تالداۋ دەپارتامەنتىنىڭ مەنەدجەرى، باس مەنەدجەرى جانە باسقارما باستىعى بولىپ جۇمىس ىستەدى. 2007 جىلدان 2011 جىلعا دەيىن «قدب – ليزينگ» اق باسقارۋشى ديرەكتورى - باسقارما مۇشەسى لاۋازىمىنا اۋىستىرىلدى.
2011-2015 جىلدارى «Petroleum Operating» جشس مۇناي جانە مۇناي ونىمدەرى ماركەتينگى دەپارتامەنتىنىڭ سىرتقى ەكونوميكالىق قىزمەت ءبولىمىنىڭ باستىعى، «Credit Systems» جشس باسقارما توراعاسى، «سبەربانك ليزينگ» جشس باس ديرەكتورىنىڭ ورىنباسارى، باس ديرەكتورى بولىپ جۇمىس ىستەدى.
2015 جىلدان 2019 جىلدىڭ اقپان ايىنا دەيىن «قازاگروقارجى» اق باسقارما توراعاسىنىڭ ورىنباسارى قىزمەتىن اتقاردى.
2019 جىلدىڭ اقپان-مامىر ايلارى ارالىعىندا «قازاقستاننىڭ استىق كونسورتسيۋمى» جشس باس ديرەكتورى بولدى.
2019 جىلدان 2021 جىلعا دەيىن «بايتەرەك» ۇبح» اق باسقارما توراعاسىنىڭ ورىنباسارى قىزمەتىن اتقاردى، ونىڭ ىشىندە «دامۋ» كاسىپكەرلىكتى دامىتۋ قورى» اق جانە «قازاقستاننىڭ دامۋ بانكى» اق ديرەكتورلار كەڭەسىنىڭ مۇشەسى بولدى.
2021 جىلدان 2024 جىلعا دەيىن جەكە سەكتوردا ءارتۇرلى قىزمەتتەر اتقاردى.
ايتا كەتەيىك، اشىق دەرەكتەردە رۋستام قاراعويشين يندۋستريا جانە قۇرىلىس ۆيتسە-ءمينيسترى تيمۋر قاراعويشيننىڭ ۇلى ەكەنى كورسەتىلگەن. 2023 جىلى ول Forbes نۇسقاسى بويىنشا قازاقستاننىڭ ەڭ ىقپالدى 50 بيزنەسمەنىنىڭ قاتارىنا كىرگەن ەدى.
