سىبايلاس جەمقورلىققا قارسى قىزمەت قايرات ساتىبالدىۇلىنا قاتىستى ءىستى تەرگەۋ شەڭبەرىندە ەلگە جىل باسىنان بەرى 44,6 ملرد تەڭگە قايتاردى. بۇل تۋرالى ۆەدومستۆونىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
«قازىرگى ۋاقىتتا قاراجات مەملەكەتكە كەلتىرىلگەن زالالدى وتەۋ ەسەبىنەن رەسپۋبليكالىق بيۋدجەتكە جىبەرىلدى»،– دەلىنگەن انتيكور حابارلاماسىندا.
انتيكور توراعاسى اسحات جۇماعاليدىڭ دەپارتامەنت باسشىلارىمەن جەدەل كەڭەسى كەزىندە ايتتى. كەڭەستە شەنەۋنىكتەر پرەزيدەنت قاسىم-جومارت توقاەۆتىڭ ۇكىمەتتىڭ كەڭەيتىلگەن وتىرىسىندا ايتقان تاپسىرمالارىن تالقىلاعان.
«مەملەكەت باسشىسى اتاپ وتكەندەي، زاڭسىز شىعارىلعان اكتيۆتەردى قايتارۋ ينۆەستيتسيالاردىڭ تاعى ءبىر كوزى بولۋعا ءتيىس»،– دەلىنگەن حابارلامادا.
ودان بولەك، پرەزيدەنت ەكونوميكاعا جاڭا سەرپىن بەرۋ ءۇشىن كاسىپكەرلەرمەن جانە ينۆەستورلارمەن تولىققاندى سەرىكتەستىك قۇرۋ قاجەتتىگىنە نازار اۋدارعانى ءسوز بولدى.
«ءبىر جىل بۇرىن انتيكورمەن بيزنەستى قورعاۋ جۇمىسى اياسىندا «بيزنەسكە جول» جوباسى ىسكە قوسىلدى. ول جەرگىلىكتى جەرلەردە كاسىپكەرلىكتىڭ دامۋىنا كەدەرگى كەلتىرەتىن جۇيەلى اكىمشىلىك كەدەرگىلەردى جويۋعا ارنالعان»،– دەلىنگەن حابارلامادا.
جوبا ىسكە قوسىلعان ساتتەن باستاپ 600-دەن استام پروبلەمالىق كەيس شەشىلىپ، 30 مىڭعا جۋىق كاسىپكەرگە كومەك كورسەتىلگەن.
سونداي-اق، پرەزيدەنتتىڭ تاپسىرماسىنا سايكەس، «اقشانى بوياۋدى» پيلوتتىق ەنگىزۋ ءۇشىن اۆتوجولدار سالۋ، اۋىل شارۋاشىلىعى تەحنيكاسى مەن جابدىقتارىن ساتىپ الۋ، سونداي-اق الەۋمەتتىك-كاسىپكەرلىك كورپوراتسيالاردىڭ قاراجاتىن پايدالانۋ سالالارى ايقىندالعان.
ەسكە سالساق، 2022 جىلدىڭ 26 قىركۇيەگىندە قازاقستاننىڭ بۇرىنعى پرەزيدەنتى نۇرسۇلتان نازارباەۆتىڭ نەمەرە ءىنىسى استانا قالاسى بايقوڭىر اۋدانىنىڭ №2 سوتى قايرات ساتىبالدىۇلىن 6 جىلعا باس بوستاندىعىنان ايىرىلعان بولاتىن. وعان قىلمىستىق كودەكستىڭ ەكى بابى «الداۋ نەمەسە سەنىمگە قيانات جاساۋ جولىمەن مۇلىكتىك زالال كەلتىرۋ»، «سەنىپ تاپسىرىلعان بوتەن مۇلىكتى يەمدەنۋ نەمەسە تالان-تاراجعا سالۋ» باپتارى بويىنشا ايىپ تاعىلعان بولاتىن. ول پروتسەسس بارىسىندا تاعىلعان ايىپتى مويىندادى.
