سىبايلاس جەمقورلىققا قارسى ءىس-قيمىل اگەنتتىگى قايرات ساتىبالدىۇلىنىڭ تاركىلەنگەن دۇنيە-مۇلكىنىڭ ءتىزىمىن جاريالادى، دەپ حابارلايدى “ادىرنا” ۇلتتىق پورتالى.
ۆەدومستۆونىڭ مالىمەتىنشە، قايرات ساتىبالدىۇلىنا قاتىستى "قازاقتەلەكوم" اق، "كولىك سەرۆيس ورتالىعى" اق قاراجاتىن اسا ءىرى مولشەردە جىمقىرۋ، قىلمىستىق جولمەن الىنعان اقشانى جانە وزگە دە مۇلىكتى زاڭداستىرۋ (جىلىستاتۋ), سونداي-اق ونىڭ باقىلاۋىنداعى كومپانيانىڭ كەدەندىك باجداردى تولەۋدەن جالتارۋ فاكتىلەرى بويىنشا قىلمىستىق ىستەر تەرگەلدى.
"تەرگەۋ بارىسىندا ق. ساتىبالدىۇلى ءوز كىناسىن تولىق مويىنداپ، زالالدى تولىق كولەمدە وتەدى، سونداي-اق قىلمىستىق قۇقىق بۇزۋشىلىقتاردى تەرگەۋگە جانە قىلمىستىق جولمەن الىنعان مۇلىكتى اشۋعا ىقپال ەتتى. 2022 جىلدان باستاپ قازىرگى ۋاقىتقا دەيىن قايرات ساتىبالدىۇلى جانە ونىمەن بايلانىستى تۇلعالاردان مەملەكەتكە زاڭسىز ساتىپ الىنعان 732,8 ملرد تەڭگە نەمەسە 1,6 ملرد اقش دوللارىنان استام سوماعا مۇلىكتىك اكتيۆتەر مەن اقشالاي قاراجات قايتارىلدى", - دەيدى ۆەدومستۆو.
ونىڭ ىشىندە 661,5 ملن اقش دوللارى شەتەلدەن تابىلدى، ولار قىسقا مەرزىمدە قازاقستانعا قايتارىلعان. انتيكور ساتىبالدىمەن بەلسەندى ىنتىماقتاستىق ناتيجەسىندە اكتيۆتەر اۆستريا، ليحتەنشتەين، ءباا، تۇركيا جانە ت. ب. ەلدەردەن قايتارىلعانىن ايتتى.
ولاردىڭ قاتارىندا اكىمشىلىك عيماراتتار، ەكسكليۋزيۆتى زەرگەرلىك بۇيىمدار، ليۋكس ۇيلەر، پاتەرلەر مەن اۆتوموبيلدەر، اكتسيالار مەن كومپانيالاردىڭ ۇلەستەرى، تەمىرجول جولدارى مەن اقشا قاراجاتتارى كىرەدى، سونىڭ ىشىندە شەتەلدىكتەر دە بار.
- "قازاقتەلەكوم" اق اكتسيالارىنىڭ 28,8% - 93,8 ملرد تگ;
- "كسو" اق – 30,2 ملرد تگ;
- 4 كومپانياداعى قاتىسۋ ۇلەسى – 10,3 ملرد تگ;
- قازاقستانداعى مۇلىكتىك اكتيۆتەر – 158,5 ملرد تگ;
- ەكسكليۋزيۆتى زەرگەرلىك بۇيىمدار – 105,39 ملرد تگ. (230 ملن.$);
- قازاقستاندىق شوتتارداعى اقشا – 36,8 ملرد تگ;
- اۆستريادان كەلگەن اقشا – 36,8 ملرد تگ. (82,1 ملن.$);
- ليحتەنشتەيننەن تۇسكەن اقشا – 116,7 ملرد تگ. (260,5 ملن.$);
- ءباا-نەن كەلگەن اقشا – 6,3 ملرد تگ. (14 ملن.$);
- تۇركيادان كەلگەن اقشا – 2,2 ملرد تگ. (4,92 ملن.$);
- باعالى قاعازداردى ساتۋ – 135,8 ملرد تگ. (300 ملن دوللار).
"ماسەلەن، قۇنى 158 ملرد تەڭگەدەن اساتىن 115 قازاقستاندىق وبەكت مەملەكەتتىك مەنشىككە بەرىلدى، ونىڭ ىشىندە 73 جىلجىمايتىن مۇلىك وبەكتىسى (13 ءۇي، 10 عيمارات، 13 جەر ۋچاسكەسى، 4 پاتەر، 3 عيمارات، قوسىمشا سالىنعان 2 مەدرەسە عيماراتى، 2 تۇراق ورنى، 25 ءۇي-جاي، 1 اياقتالماعان قۇرىلىس وبەكتىسى), 37 جىلجىمالى مۇلىك وبەكتىسى (29 اۆتوماشينا، 5 ارنايى تەحنيكا، 3 كۆادروتسيكل) جانە وزگە دە مۇلىك", - دەيدى انتيكور.
اقپاراتقا سايكەس، مۇلىكتىڭ ءبىر بولىگى ونىڭ جاقىن تۋىستارىنا، اففيليرلەنگەن تۇلعالارىنا جانە باقىلاۋداعى كومپانيالارعا راسىمدەلگەن.
استانا جانە الماتى قالالارىندا مەملەكەتكە بەرىلگەن اكىمشىلىك عيماراتتاردىڭ جالپى اۋدانى 180 مىڭ شارشى مەتردەن اسادى.
بۇرىن بۇل اكتيۆتەر جالعا بەرىلىپ، جىل سايىن مەنشىك يەسىنە ميللياردتاعان تابىس اكەلگەن.
"ليۋكس نىساندارىنىڭ ءبىرى – اقمولا وبلىسىنىڭ باراپ اۋىلىندا جالپى اۋدانى 1,5 مىڭ شارشى مەتر، جەر ۋچاسكەسى 135 گەكتار بۇرىنعى ق.ساتىبالدىۇلى رەزيدەنتسياسى – استانا قالاسىنىڭ ءبىلىم باسقارماسىنا بەرىلدى", - دەيدى ۆەدومستۆو.
بۇل قاراجاتتار مەملەكەتكە قايتارىلىپ، الەۋمەتتىك ماقساتتاردا پايدالانۋعا باعىتتالدى.
