دۇنيەنىڭ ديكتاتۋرا ورناعان ەلدەرىندە باسشىلارى حالىققا قاراي قارۋ رەتىندە جۇمساعان اسكەرلەرنىڭ كوبىسى حالىقتىڭ جاعىنا اۋىپ كەتىپ جاتىر. مىسالى، كەشەگى ارمەنيادا، گوندۋراستاعى ميتينگىدە اسكەرلەر حالىقتىڭ جاعىنا ءوتىپ كەتسە، بۇگىن عانا گرۋزياداعا ميتينگىدە اسكەرلەر حالىقتىڭ تاراپىنا اۋىپ كەتتى. بۇل نامىس پەن رۋح، ەلىمىزدىڭ، حالقىمىزدىڭ بالاسى ەدىك، حالقىمىزدى قيىن جاعدايعا قالدىرمايمىز دەگەن ەلدىڭ ساربازدارىنىڭ ءىسى. اسكەر دە، پوليتسيا دا حالىقتىڭ بالاسى. مەن پوليتسياعا بۇل ەرلىكتى جاسايدى دەپ سەنە المايمىن، بىراق ساربازدارعا سەنەمىن. سارباز بەن پوليتسيانى حالىقتىڭ تاراپىنا تارتىپ الۋ كوپشىلىك بىرىكسە عانا ىسكە اسادى. وسى پروتسەسس ارقىلى دا مىناۋ جۇيەنىڭ قابىرعاسىن سوگۋگە بولادى. 30 جىل بويى ادىلەتسىز جۇيەنىڭ ارحيۆكە كەتۋىن تاعاتسىزدانا كۇتكەن قازاق حالقى دا ءوزىنىڭ اسكەرىنىڭ وسىنداي ەرلىگىن كۇتىپ وتىر. بۇل پروتسەستىڭ باسى باستالىپ تا قويدى. ال ەگەر دە جالدامالى بىرەۋلەر بولسا اڭگىمە باسقا بولادى. كەشەگى ميتينگىدە ساربازعا گۇل بەرگەن نارسەتە قىزعا قۋىرشاق الىپ كەلىپ بەرگەن ساربازدى، ءوز ەركىمەن جۇمىستان كەتىپ، حالقىما قارسى كەلمەيمىن دەگەن جىگىتتەردى دە وزدەرىڭىز ينتەرنەتتەن كورىپ وتىرسىزدار. بۇل دا نامىس پەن ەلدىڭ جاعدايىن ويلاعاننان تۋىنداعان ارەكەت. ولار دا ءبىز سياقتى جىگىتتەر. بۇل دا جاقسى ءۇردىس. ءبىر نارسە انىق، پوليتسيانىڭ ىشىندە نامىستان جۇرداي ادامدار وتە كوپ. ءتۇپتىڭ تۇبىندە ولار دا ابدەن شارشايدى. الداعى ۋاقىتتا حالىقتىڭ سوتى مەن جازاسى كۇتىپ وتىرعانىن دا بىلەدى. سوڭىندا بارىنە دە حالىقتىڭ جازاسى بولۋى مىندەتتى. پوليتسيا مەن ساربازداردى دا حالىقتىڭ جاعىنا تارتۋدىڭ بارلىق مەحانيزمدەرىن جاساي بەرۋ كەرەك. دەنى دۇرىس ەلدىڭ ساربازى حالىققا قاراپ قول كوتەرمەيدى. كوپ ۇزاماي وسى ءۇردىس بىزگە دە كەلەدى. حالىق 30 جىل ءتوزدى، ارى قاراي دا ءتوزىپ وتىرا بەرەدى دەگەن دە ابسۋرد. ەسەسىنە ءبىزدىڭ قازاق حالقى سوڭعى كەزدە قايتا قايتا باس كوتەرىپ جاتىر. مۇنى بيلىك تاراپىنان تەك جاقسىلىقپەن، ادامگەرشىلىكپەن عانا توقتاتا الادى. ال جاقسىلىق پەن ادامگەرشىلىك جاساۋ جەمقور وپاسىزداردىڭ قولىنان كەلمەيدى. ولار دۇرىس جولدى تاڭداپ وتىرعان جوق، كەرىسىنشە حالىقتى اشۋلاندىرىپ جاتىر. ەسكەرەتىن تاريحي ءبىر جاعداي بار، تارحيتاعى بارلىق كوتەرىلىس حالىقتىڭ جەڭىسىمەن اياقتالعان. ەرتەڭ اسكەرلەر حالىقتىڭ تاراپىنا ءوتىپ جاتسا تاڭ قالماڭىزدار. ساربازدار بيلىكتى ەمەس، وتاندى، حالىقتى قورعاۋ ءۇشىن انت بەرەدى.
بەكبولات قارجان
"ادىرنا" ۇلتتىق پورتالى
