قازاقستاندىق جۇرگىزۋشىلەر 16 جاسقا تولماعان بالالاردى اۆتوبۋستان شىعارىپ جىبەرگەنى ءۇشىن ايىپپۇل تولەيتىن بولادى، دەپ حابارلايدى "ادىرنا" ۇلتتىق پورتالى.
دەپۋتات جۇلدىز سۇلەيمەنوۆا حابارلاعانداي، زاڭ جوبالارى بالالارعا دۇرىس قاراماعانى ءۇشىن اكىمشىلىك جاۋاپكەرشىلىكتى قاتاڭداتادى. مىسالى:
- كامەلەتكە تولماعان بالانى جابىرلەگەنى (بۋللينگ) ءۇشىن (ەسكەرتۋ نە 10 اەك-تەن 30 اەك-كە دەيىن ايىپپۇل);
- اتا-اناسىنىڭ نەمەسە باسقا دا زاڭدى وكىلدەرىنىڭ كامەلەتكە تولماعان بالانىڭ قاۋىپسىزدىگىن قامتاماسىز ەتۋ جونىندەگى شارالاردى ورىنداماعانى ءۇشىن (10 اەك ايىپپۇل);
- ەرەسەكتەر ەرىپ جۇرمەگەن 16 جاسقا دەيىنگى كامەلەتكە تولماعان بالانى اۆتوبۋستان جانە وزگە دە قوعامدىق جولاۋشىلار كولىگىنەن ماجبۇرلەپ تۇسىرگەنى ءۇشىن (5 اەك ايىپپۇل).
قىلمىستىق جاۋاپكەرشىلىك بويىنشا 16 جاسقا دەيىنگى بالالارعا جىنىستىق سيپاتتا تيىسكەنى ءۇشىن (200 ساعاتقا دەيىن قوعامدىق جۇمىستار، 40 كۇنگە دەيىن قاماققا الۋ), كامەلەتكە تولماعان بالانى زاڭسىز باس بوستاندىعىنان ايىرعانى ءۇشىن (5 جىلدان 10 جىلعا دەيىن باس بوستاندىعىنان ايىرۋ), كامەلەتكە تولماعان بالانى ۇرلاعانى ءۇشىن (10 جىلدان 15 جىلعا دەيىن باس بوستاندىعىنان ايىرۋ) جازاسى تاعايىندالادى.
