تج ءمينيسترى پاۆلودار وبلىسىندا «مايقايىڭالتىن» اق-نىڭ التىن كەنىشىندەگى ويىققا ءتۇسىپ كەتكەن اۆتوبۋستى شىعارۋ جۇمىستارى تۋرالى ايتتى، دەپ حابارلايدى "ادىرنا" ۇلتتىق پورتالى.
«ازىرشە اۆتوبۋسقا دەيىن 5 مەتر قالدى. وتە باياۋ ءتۇسۋ قاجەت. ەڭ باستىسى – قۇتقارۋشىلار مەن ويىقتى ارشىپ جاتقان جۇمىسشىلاردىڭ قاۋىپسىزدىگى. بۇل وڭاي شارۋا ەمەس. ناقتى مەرزىمىن، ساعاتىن، اي-كۇنىن ايتۋ قيىن. ويتكەنى قۇتقارۋ جۇمىستارى قايتا-قايتا ءۇزىلىپ قالىپ جاتىر – اۋماقتى سكانەرلەپ، قاۋىپسىز ەكەنىنە كوز جەتكىزىلىپ تۇرۋ كەرەك. اۆتوبۋستى، ءبىر قۇتقارۋشى مەن جۇرگىزۋشىنى مىندەتتى تۇردە الىپ شىعامىز. جۇمىس ءجۇرىپ جاتىر، مەرزىمىن ايتۋ قازىر قيىن»، - دەدى ول ۇكىمەت وتىرىسىنان كەيىن وتكەن بريفينگىدە.
ايتا كەتەيىك، مينيستر قازاقستاندىق قۇتقارۋشىلاردىڭ مۇنداي جاعدايعا ءبىرىنشى رەت تاپ كەلىپ تۇرعانىن اتاپ ءوتتى.
«بۇل ەرەكشە جاعداي. قازاقستان بۇرىن-سوڭدى بولماعان. سوندىقتان تاجىريبەمىز دە جوق. قازىر الەمدەگى تاجىريبەلەردى زەرتتەپ جاتىرمىز. ءسىز اۋەدەن كوتەرۋ ماسەلەسىن ايتتىڭىز عوي. ونىڭ ىقتيمالدىعى از. بۇل جەردە جەر قىرتىسىن ارشىپ، اۆتوبۋسقا جەتىپ الۋ قاجەت. ال جەر قىرتىسىن ارشۋ ءۇشىن ەكسكاۆاتور مەن باسقا دا تەحنيكالاردى پايدالانۋ كەرەك»، - دەدى سىرىم ءشارىپحانوۆ.
"ادىرنا" ۇلتتىق پورتالى
