20 ماۋسىمدا تىكەلەي ەفيردە تۇرعىندار سۇراقتارىنا جاۋاپ بەرگەن رەسەي پرەزيدەنتى ۆلاديمير پۋتين ءسوزىن ۇلتتىق جوبالاردان باستادى. ونىڭ ايتۋىنشا، اقىرعى ماقسات - رەسەيلىكتەردىڭ ءومىر ءسۇرۋ ساپاسىن جاقسارتۋ. وسى ماقساتتا مەملەكەت قوسىمشا قۇن سالىعىن ارتتىرۋ سياقتى قوعامعا جايسىز تيگەن شارالاردى اتقارعان، بىراق ول تالپىنىسى "ناتيجەسىز" بولماعان.
ء"وندىرىس كولەمى ۇلعايا باستادى، ينفلياتسيا دەڭگەيى تومەندەدى، تابىس كوبەيە باستادى" دەدى پۋتين.
بۇدان سوڭ پرەزيدەنتكە "نەگە رەسەيلىكتەردىڭ ءومىر ءسۇرۋ دەڭگەيى ناشارلاي باستادى؟ نەگە جالاقى تومەن؟ نەگە تاماققا اقشا جەتپەيدى؟" دەگەن سۇراقتار قويىلدى. پۋتين رەسەيدە 10 مىڭ رۋبلدىك (شامامەن 50 مىڭ تەڭگە) جالاقى بار دەگەنگە كۇمانمەن قارادى. الايدا مۇنداي ماسەلەلەر بارىن مويىنداپ، تابىستىڭ ازايۋىن باتىس سانكتسياسى، مۇناي باعاسىنىڭ ارزانداۋى جانە رەسەيلىكتەردىڭ وتە كوپ نەسيە الاتىندىعىمەن بايلانىستىردى. پرەزيدەنتتىڭ ايتۋىنشا، حالىقتىڭ شىنايى تابىسى سوڭعى بىرنەشە جىلدا ازايعان، بىراق قازىر قايتا وسە باستاعان. "ورتاشا جالاقى كولەمى ۇلعايىپ، ەڭ تومەنگى جالاقى مولشەرى، زەينەتاقى ءبىر سوزبەن ايتقاندا ءبارى ءوستى" دەدى پۋتين.
جالاقى ماسەلەسىنەن سوڭ اڭگىمە اۋانى دەنساۋلىق ساقتاۋ ماسەلەسىنە اۋىستى: كادرلار تاپشىلىعى، العاشقى مەديتسينالىق كومەكتىڭ جوقتىعى، جەڭىلدىكپەن ءدارى-دارمەك الا الماۋ. پۋتين سۇراقتاردىڭ ءبىراز بولىگىن دەنساۋلىق ساقتاۋ مينيسترىنە بۇردى.
بيىل پۋتينگە ەڭ كوپ قويىلعان سۇراقتاردىڭ اراسىندا قوقىس جانە "قوقىس رەفورماسى" دەگەن اتپەن بەلگىلى قالدىق وڭدەيتىن زاۋىتتاردىڭ سالىنۋى بولدى. ءپۋتيننىڭ ايتۋىنشا، ونداعان جىل بويى رەسەي قوقىستى جيناپ كەلگەن، بىراق ونىمەن ەلدە ەشكىم اينالىسپاعان. ال تىنىق مۇحيتىندا قالدىق ارالدارى ءجۇزىپ ءجۇر. بيلىكتىڭ قالدىقتى وڭدەۋ بويىنشا باعدارلاماسىنا توقتالعان پۋتين شامامەن 200 زاۋىتتىڭ قۇرىلىسى جوسپاردا بار ەكەنىن ايتتى. ونىڭ ايتۋىنشا، بۇل جوبالارعا 300 ميلليارد رۋبل كولەمىندە قارجى بولىنەدى. ونىڭ ۇشتەن ءبىر بولىگى بيۋدجەتتەن الىنادى، قالعانىن بيزنەس قامتاماسىز ەتەدى. قالدىق رەفورماسىنا قارسى نارازىلىق شارالارى تۋرالى ەشكىم سۇراق قويعان جوق جانە پرەزيدەنت بۇل ماسەلەنى قوزعامادى.
تىكەلەي ەفيردى جۇرگىزۋشىنىڭ دەرەگىنشە، ەفير باستالعانعا دەيىن شامامەن ءبىر جارىم ميلليوننان استام سۇراق تۇسكەن. وتكەن جىلى ەكى جارىم ميلليون سۇراق بولعان. كرەمل بۇل ايىرماشىلىقتى ىستىق اۋا رايىمەن تۇسىندىرگەن.
"ازاتتىق" راديوسى
