20 maýsymda tikeleı efırde turǵyndar suraqtaryna jaýap bergen Reseı prezıdenti Vladımır Pýtın sózin ulttyq jobalardan bastady. Onyń aıtýynsha, aqyrǵy maqsat - reseılikterdiń ómir súrý sapasyn jaqsartý. Osy maqsatta memleket qosymsha qun salyǵyn arttyrý sııaqty qoǵamǵa jaısyz tıgen sharalardy atqarǵan, biraq ol talpynysy "nátıjesiz" bolmaǵan.
"Óndiris kólemi ulǵaıa bastady, ınflıaııa deńgeıi tómendedi, tabys kóbeıe bastady" dedi Pýtın.
Budan soń prezıdentke "Nege reseılikterdiń ómir súrý deńgeıi nasharlaı bastady? Nege jalaqy tómen? Nege tamaqqa aqsha jetpeıdi?" degen suraqtar qoıyldy. Pýtın Reseıde 10 myń rýbldik (shamamen 50 myń teńge) jalaqy bar degenge kúmánmen qarady. Alaıda mundaı máseleler baryn moıyndap, tabystyń azaıýyn batys sankııasy, munaı baǵasynyń arzandaýy jáne reseılikterdiń óte kóp nesıe alatyndyǵymen baılanystyrdy. Prezıdenttiń aıtýynsha, halyqtyń shynaıy tabysy sońǵy birneshe jylda azaıǵan, biraq qazir qaıta óse bastaǵan. "Ortasha jalaqy kólemi ulǵaıyp, eń tómengi jalaqy mólsheri, zeınetaqy bir sózben aıtqanda bári ósti" dedi Pýtın.
Jalaqy máselesinen soń áńgime aýany densaýlyq saqtaý máselesine aýysty: kadrlar tapshylyǵy, alǵashqy medıınalyq kómektiń joqtyǵy, jeńildikpen dári-dármek ala almaý. Pýtın suraqtardyń biraz bóligin densaýlyq saqtaý mınıstrine burdy.
Bıyl Pýtınge eń kóp qoıylǵan suraqtardyń arasynda qoqys jáne "qoqys reformasy" degen atpen belgili qaldyq óńdeıtin zaýyttardyń salynýy boldy. Pýtınniń aıtýynsha, ondaǵan jyl boıy Reseı qoqysty jınap kelgen, biraq onymen elde eshkim aınalyspaǵan. Al Tynyq muhıtynda qaldyq araldary júzip júr. Bıliktiń qaldyqty óńdeý boıynsha baǵdarlamasyna toqtalǵan Pýtın shamamen 200 zaýyttyń qurylysy josparda bar ekenin aıtty. Onyń aıtýynsha, bul jobalarǵa 300 mıllıard rýbl kóleminde qarjy bólinedi. Onyń úshten bir bóligi bıýdjetten alynady, qalǵanyn bıznes qamtamasyz etedi. Qaldyq reformasyna qarsy narazylyq sharalary týraly eshkim suraq qoıǵan joq jáne prezıdent bul máseleni qozǵamady.
Tikeleı efırdi júrgizýshiniń dereginshe, efır bastalǵanǵa deıin shamamen bir jarym mıllıonnan astam suraq túsken. Ótken jyly eki jarym mıllıon suraq bolǵan. Kreml bul aıyrmashylyqty ystyq aýa raıymen túsindirgen.
"Azattyq" radıosy
