قازاقستان مەن رەسەيدىڭ بىرلەسكەن «بايتەرەك» جوباسى اياسىندا جوسپارلانعان «سۇڭقار» زىمىرانىنىڭ العاشقى ۇشىرىلىمى تاعى دا كەيىنگە شەگەرىلدى، دەپ حابارلايدى «ادىرنا» ءتىلشىسى.
بۇل جولى ول 30 ساۋىرگە اۋىستىرىلدى.
«ۇشىرۋ ەرتەڭگە ساعات 16:00-گە اۋىستىرىلدى»،–دەلىنگەن حابارلامادا.
ەسكە سالايىق، بۇگىن بايقوڭىردا ساعات 16.00-گە جوسپارلانعان «سۇڭقار» زىمىرانىنىڭ ۇشىرىلىمى ەكى ساعاتقا شەگەرىلگەن ەدى. وعان ەكىنشى ساتىداعى توتىقتىرعىش باكتارىندا قىسىمنىڭ تومەندەۋى سەبەپ بولعان.
باستاپقىدا «سۇڭقار» زىمىرانىن 27 ناۋرىزدا ۇشىرۋ جوسپارلانعان. الايدا تەحنيكالىق سەبەپتەرگە بايلانىستى ستارت كۇنى بىرنەشە رەت رەزەرۆتىك كۇندەرگە اۋىستىرىلعان.
«بايتەرەك» عارىشتىق زىمىران كەشەنى — قازاقستان مەن رەسەيدىڭ بىرلەسكەن جوباسى. ول «بايقوڭىر» كەشەنىندە ەكولوگيالىق تازا وتىن كومپونەنتتەرىن پايدالاناتىن زىمىراندارمەن عارىشقا ۇشىرۋ جۇمىستارىن جۇرگىزۋگە ارنالعان جەرۇستى ينفراقۇرىلىمدى قۇرۋدى كوزدەيدى. جوبا 2004 جىلى قۇرىلعان، ال 2005 جىلى سول كەزدەگى قازاقستان پرەزيدەنتى نۇرسۇلتان نازارباەۆ پەن رەسەي پرەزيدەنتى ۆلاديمير ءپۋتيننىڭ بايقوڭىرعا ساپارى كەزىندە رەسمي تۇردە ىسكە قوسىلعان.
باستاپقىدا «انگارا» زىمىران-تاسىعىشىن پايدالانۋ جوسپارلانعان، ال وعان ارنالعان ۇشىرۋ كەشەنىن №200 الاڭداعى بۇرىنعى «پروتون» زىمىرانىنىڭ №40 ۇشىرۋ قوندىرعىسىنىڭ ورنىندا سالۋ كوزدەلگەن ەدى.
كەيىن رەسەي جوسپارىن وزگەرتىپ، قۇرىلىس ءۇشىن №250 الاڭداعى بۇرىن «ەنەرگيا» زىمىرانىن سىناۋعا ارنالعان امبەباپ ستەند-ستارت ورنىن ۇسىندى. الايدا بۇل جوبا دا جۇزەگە اسپادى.
كەيىنىرەك «زەنيت» زىمىراندارىن ۇشىرۋ باعدارلاماسى اياقتالعان سوڭ، №42 الاڭداعى قۇراستىرۋ-سىناق كورپۋسى مەن №45 الاڭداعى ۇشىرۋ كەشەنىن قامتيتىن بارلىق جەرۇستى ينفراقۇرىلىم «بايقوڭىر» كەشەنىن رەسەي فەدەراتسياسىنىڭ جالعا الۋ كەلىسىمىنەن شىعارىلىپ، قازاقستان تاراپىنا — «بايتەرەك» بىرلەسكەن كاسىپورنىنا بەرىلدى.
«انگارا» زىمىرانىنىڭ ورنىنا، وعان ارنالعان ۇشىرۋ كەشەنىنىڭ قۇرىلىسى باستالماعاندىقتان، جاڭا «سۇڭقار» زىمىران-تاسىعىشى بەكىتىلدى. بۇل زىمىران ءۇشىن «زەنيت» كەشەنىنەن قالعان ينفراقۇرىلىمدى بەلگىلى ءبىر جاڭعىرتۋلار ارقىلى پايدالانۋعا مۇمكىندىك بولدى.
«سۇڭقار» زىمىران-تاسىعىشى — ورتا كلاستى ەكى ساتىلى زىمىران. ول رەسەيدەگى «ركتس پروگرەسس» اكتسيونەرلىك قوعامىندا وندىرىلەدى. ونى ۇشىرۋعا سوڭعى بىرنەشە جىل تالپىنىس جاسالعانىمەن، ۇنەمى كەيىن سىرعىتىلىپ كەلەدى. زىمىران ايلاققا قويىلعان سوڭ دا ونى ۇشىرۋ ونداعان مارتە كەيىنگە شەگەرىلدى.
تەحنيكالىق سيپاتتامالارى: زىمىراننىڭ بيىكتىگى — باس قاپتاماسىنا بايلانىستى 58,8 م نەمەسە 65,2 م; ديامەترى — 4,1 م; ۇشىرۋ ماسساسى — 526–531 توننا; تومەنگى جەر وربيتاسىنا شىعاراتىن پايدالى جۇك ماسساسى — 17,4 توننا; گەوستاتسيونارلىق وربيتاعا — 2,5 توننا.
قولدانىلاتىن وتىن مەن توتىقتىرعىش — ەكولوگيالىق قاۋىپسىز نافتيل (كەروسين ءتۇرى) جانە سۇيىق وتتەگى.
بۇعان دەيىن رەسەيلىك باق-تىڭ زىمىران اتاۋىنا قاتىستى داۋىن جاريالاعان ەدىك. ال بىلتىر بايقوڭىرداعى گاگارين ستارت الاڭىنىڭ ورنىنان كونە وركەنيەت وشاعى تابىلعانى بەلگىلى بولدى.
