شەشەن ەلىنىڭ پرەزيدەنتى رامزان قادىروۆتىڭ 24 جاستاعى ەكىنشى قىزى حاديجات شەشەنستان باسشىسى اكىمشىلىگى مەن ۇكىمەتى جەتەكشىسىنىڭ ورىنباسارى بولىپ تاعايىندالدى، دەپ حابارلايدى «ادىرنا» ءتىلشىسى.
مەملەكەت باسشىسىنىڭ ايتۋىنشا، بۇل باستامانى ءوز اكىمشىلىگىنىڭ جەتەكشىسى گالاس تايماسحانوۆ كوتەرگەن.
بۇعان دەيىن حاديجات قادىروۆا گروزنىي قالاسىنىڭ مەكتەپكە دەيىنگى ءبىلىم دەپارتامەنتىن باسقاردى. ەندى ول الەۋمەتتىك سالا بويىنشا جاۋاپتى بولادى.
ايتا كەتەيىك، وتكەن جىلى قازان ايىندا قادىروۆ قىزىنا «الەۋمەتتىك سالانىڭ ەڭبەك سىڭىرگەن قايراتكەرى» قۇرمەتتى اتاعىن بەردى. سول ايدا حاديجاتتىڭ كۇيەۋى، شەشەنستاننىڭ بۇرىنعى ىشكى ىستەر ءمينيسترى ادام الحانوۆتىڭ ۇلى شەشەنستان دەنساۋلىق ساقتاۋ مينيسترلىگىنىڭ باسشىسى بولىپ تاعايىندالدى.
