تانىمال رەسەيلىك تەلەجۇرگىزۋشى تينا كاندەلاكي قازاقستان جايلى جازعان جازباسىنان كەيىن قىرعىزستاندى سىناۋعا كوشتى. اتاپ ايتقاندا، ورىس ءتىلىنىڭ قىرعىز ەلىندە دە شەتتەتىلىپ جاتقانىن تيەك ەتتى. الايدا، بۇل جولى جۋرناليست الەۋمەتتىك جەلىلەردەن جازباسىن "جىم" قىلىپ، تەز شەگىنە جونەلدى، دەپ حابارلايدى "ادىرنا" ۇلتتىق پورتالى.
«قىرعىزستاندا دا مەملەكەتتىك دەڭگەيدە ورىس ءتىلىن شەتتەتىپ جاتىر. ءبىر جىلدان استام ۋاقىتتان بەرى قىرعىز بيلىگى بىشكەكتىڭ ءتورت اۋدانىنىڭ اتاۋلارىنىڭ وزگەرۋى بويىنشا جۇمىستار اتقاردى. ءبارىن قيىنداتىپ نە كەرەگى بار؟" دەپ جازدى كاندەلاكي.
ول قىرعىزستانداعى اتلمىش جايتتاردى ۋكراينانىڭ ارەكەتتەرىمەن سالىستىردى. وندا قالالار، كوشەلەر جانە كەڭەس ۇكىمەتىمەن جانە رەسەيگە قاتىستى باسقا دا گەوگرافيالىق اتاۋلار وزگەرتىلدى. سونداي-اق، ول قىرعىزدار بۇل ىسىمەن تاريحتارىنان ايىرىلىپ جاتقانىن اتاپ ءوتتى.
قازاقستانداعىداي، بۇل جازبا دا قىرعىز حالقىنىڭ اشۋىنا ءتيدى. ناتيجەسىندە جۋرناليست جازبانى جويدى.
بۇعان دەيىن رەسەيلىك تەلەجۇرگىزۋشى جانە پروديۋسەر تينا كاندەلاكي قازاقستاننىڭ تەمىرجول ۆوكزالدارىنىڭ اتاۋىن وزگەرتۋىنە قاتىستى سىن ايتتى. قازاقستاندىق جۋرناليست دينارا ءساتجان ارانداتۋشىلىق تۋدىرعان جازباعا جاۋاپ بەردى. سودان كەيىن كاندەلاكي قازاقستاندىقتاردى قاڭتار كەزىندە رەسەيدىڭ كومەگىنە جۇگىندى دەپ، ءبىر شۋلاتتى.
22 قاڭتاردا قازاقستان رەسپۋبليكاسى سىرتقى ىستەر مينيسترلىگىنىڭ رەسمي وكىلى ايبەك سمادياروۆ كاندەلاكيدىڭ ايتقاندارىنا قاتىستى تۋرالى تۇسىنىكتەمە بەردى.
«مەملەكەت مۇنى ەشقاشان كەشىرمەيدى. ول قازاقستانعا كەلمەيدى، كەلسە دە، كىرمەيدى »، - دەدى ول.
