فوتو: Depositphotos
رەسەيدىڭ ساراتوۆ وبلىسىنا قاراستى ەنگەلس قالاسىندا 3 قىركۇيەك تاڭەرتەڭ رەسەي اەروعارىش كۇشتەرىنىڭ (ۆكس) وفيتسەرىنە بەلگىسىز ادام قاستاندىق جاساۋعا ارەكەت جاساعان. بۇل تۋرالى رەسەيلىك باق پەن Telegram-ارنالار قۇقىق قورعاۋ ورگاندارىنداعى دەرەككوزدەرگە سىلتەمە جاساپ حابارلادى.
شابۋىل «پروبۋجدەنيە» ەلدى مەكەنىندەگى ءبىر نىساننىڭ ماڭىندا بولعان.
اقپاراتقا سايكەس، موتوتسيكل مىنگەن، باسىنا شلەم كيگەن ەر ادام اسكەري قىزمەتكەرگە جاقىنداعان. Shot باسىلىمىنىڭ جازۋىنشا، شابۋىل جاساعان ادام وفيتسەر دۇكەننەن شىعىپ كەلە جاتقان كەزدە وعان ەكى رەت وق اتقاننان كەيىن وقيعا ورنىنان قاشىپ كەتكەن.
وقتىڭ ءبىرى اسكەري قىزمەتكەردىڭ بەتىنە، ەكىنشىسى ىشىنە تيگەن.
“وفيتسەردىڭ جۇرگىزۋشىسى دە جارالانعان. الايدا ول جەدەل جاردەم شاقىرا العان”، دەپ حابارلايدى Mash.
جارالانعان اسكەري قىزمەتكەر الدىمەن ساراتوۆ قالاسىنا جەتكىزىلىپ، وعان شۇعىل مەديتسينالىق كومەك كورسەتىلگەن. كەيىن ونى ارنايى ۇشاقپەن ماسكەۋگە جەتكىزۋ تۋرالى شەشىم قابىلدانعان.
ۋكراينالىق مونيتورينگتىك Supernova+ Telegram-ارناسىنىڭ مالىمەتىنشە، شابۋىلعا ۇشىراعان ادام – گەنەرال-مايور نيكولاي ۆارپاحوۆيچ. ول رەسەي اەروعارىش كۇشتەرىنىڭ الىس قاشىقتىقتاعى اۆياتسيا قۇرامىنداعى 22-اۋىر بومبالاۋشى اۆياتسيا ديۆيزياسىنىڭ كومانديرى.
بۇعان دەيىن ۋكراينانىڭ قاۋىپسىزدىك قىزمەتى (سبۋ) مەن باس پروكۋراتۋراسى ۆارپاحوۆيچكە كيەۆتەگى «وحماتدەت» بالالار اۋرۋحاناسىنا 2024 جىلعى 8 شىلدەدە جاسالعان سوققىعا قاتىستى سىرتتاي كۇدىك جاريالاعان.
ۋكراينالىق تەرگەۋ نۇسقاسى بويىنشا، گەنەرال سوققى جاساۋ تۋرالى بۇيرىق بەرگەن. وسىدان كەيىن وعان باعىنىشتى الىس قاشىقتىقتاعى اۆياتسيا بولىمشەلەرى تۋ-95مس بومبالاۋشى ۇشاعىنان اۋرۋحاناعا ح-101 قاناتتى زىمىرانىن ۇشىرعان.
سوڭعى ۋاقىتتا رەسەي اسكەري قىزمەتكەرلەرىنە قاتىستى بىرنەشە شابۋىل تىركەلدى.
27 تامىزدا سانكت-پەتەربۋرگتە اۋە كۇشتەرى مەن اۋە قورعانىسى اسكەرلەرىنىڭ پودپولكوۆنيگى ايەلىمەن بىرگە وتىرعان كولىك جارىلدى. اسكەري قىزمەتكەر قازا تاۋىپ، ونىڭ ايەلى جانساقتاۋ بولىمىنە جاتقىزىلدى. تەرگەۋشىلەر كولىكتىڭ ىشىندە قولدان جاسالعان جارىلعىش قۇرىلعى ىسكە قوسىلعانىن انىقتاعان.
13 تامىزدا سەۆاستوپولدە رەسەي اسكەري-تەڭىز كۇشتەرىنىڭ 1-رانگ كاپيتانى روبەرت شاگەەۆ جارىلىس سالدارىنان قازا تاپتى. قىرىم اننەكسيالانعانعا دەيىن ول ۋكراينانىڭ اسكەري-تەڭىز كۇشتەرىندە قىزمەت ەتىپ، «زاپوروجە» سۇڭگۋىر قايىعىنا كوماندالىق جاساعان.
1 تامىزدا ماسكەۋدەگى Balzi Rossi مەيرامحاناسىندا جارىلىس بولدى. بەس ادام قازا تاۋىپ، كەمىندە 19 ادام جارالاندى.
الدىن الا بولجام بويىنشا، جارىلىستىڭ ىقتيمال نىساناسى رەسەي اەروعارىش كۇشتەرىنىڭ باس قولباسشىسى الەكساندر چايكو بولۋى مۇمكىن. ۋكراينا بيلىگى ونى بۋچاداعى اسكەري قىلمىستارعا قاتىسى بار دەپ ايىپتايدى.
جارىلىستان كەيىن چايكونىڭ جاعدايى تۋرالى رەسمي اقپارات جاريالانعان جوق.
