Tanymal reseılik telejúrgizýshi Tına Kandelakı Qazaqstan jaıly jazǵan jazbasynan keıin Qyrǵyzstandy synaýǵa kóshti. Atap aıtqanda, orys tiliniń qyrǵyz elinde de shettetilip jatqanyn tıek etti. Alaıda, bul joly jýrnalıst áleýmettik jelilerden jazbasyn "jym" qylyp, tez shegine jóneldi, dep habarlaıdy "Adyrna" ulttyq portaly.
«Qyrǵyzstanda da memlekettik deńgeıde orys tilin shettetip jatyr. Bir jyldan astam ýaqyttan beri qyrǵyz bıligi Bishkektiń tórt aýdanynyń ataýlarynyń ózgerýi boıynsha jumystar atqardy. Bárin qıyndatyp ne keregi bar?" dep jazdy Kandelakı.
Ol Qyrǵyzstandaǵy atlmysh jaıttardy Ýkraınanyń áreketterimen salystyrdy. Onda qalalar, kósheler jáne Keńes úkimetimen jáne Reseıge qatysty basqa da geografııalyq ataýlar ózgertildi. Sondaı-aq, ol qyrǵyzdar bul isimen tarıhtarynan aıyrylyp jatqanyn atap ótti.
Qazaqstandaǵydaı, bul jazba da qyrǵyz halqynyń ashýyna tıdi. Nátıjesinde jýrnalıst jazbany joıdy.
Buǵan deıin reseılik telejúrgizýshi jáne prodıýser Tına Kandelakı Qazaqstannyń temirjol vokzaldarynyń ataýyn ózgertýine qatysty syn aıtty. Qazaqstandyq jýrnalıst Dınara Sátjan arandatýshylyq týdyrǵan jazbaǵa jaýap berdi. Sodan keıin Kandelakı qazaqstandyqtardy Qańtar kezinde Reseıdiń kómegine júgindi dep, bir shýlatty.
22 qańtarda Qazaqstan Respýblıkasy Syrtqy ister mınıstrliginiń resmı ókili Aıbek Smadııarov Kandelakıdiń aıtqandaryna qatysty týraly túsinikteme berdi.
«Memleket muny eshqashan keshirmeıdi. Ol Qazaqstanǵa kelmeıdi, kelse de, kirmeıdi », - dedi ol.
