الماتى وبلىسىندا بەردىبەك سوقپاقباەۆتىڭ ەسكەرتكىشى بوي كوتەرمەك. بۇل تۋرالى ءوڭىر اكىمى قۋات سۇلتانعازيۆ جازۋشىنىڭ 100 جىلدىق مەرەيتويىنىڭ سالتاناتتى شاراسىندا ايتتى، دەپ حابارلايدى «ادىرنا» ءتىلشىسى.
«پرەزيدەنتىمىز قاسىم-جومارت كەمەلۇلى توقاەۆ ءتول ادەبيەتىمىزدىڭ دامۋىنا ەرەكشە كوڭىل ءبولىپ كەلەدى. وسى ورايدا ادەبيەتىمىزدىڭ ءبىرتۋار تۇلعاسى بەردىبەك سوقپاقباەۆتىڭ مەرەيتويىن تۋعان ولكەسىندە كەڭ كولەمدى اتاپ ءوتۋ پرەزيدەنتتىڭ رۋحانيات سالاسىنداعى ساياساتىن قولداۋ دەپ بىلەمىز.
رايىمبەك اۋدانىنىڭ ورتالىعى – نارىنقول اۋىلىنداعى بەردىبەك سوقپاقباەۆتىڭ اتى بەرىلەتىن ساياباقتا جازۋشىنىڭ ەڭسەلى ەسكەرتكىشى بوي كوتەرەتىن بولادى»،—دەدى ول.
اكىم الداعى ۋاقىتتا بۇدان بولەك بىرنەشە جۇمىستىڭ اتقارىلاتىنىن اتاپ ءوتتى.
«نارىنقولداعى بەردىبەك سوقپاقباەۆ اتىنداعى مەكتەپ-گيمنازياعا اعىمداعى جوندەۋ جۇمىستارىن جۇرگىزۋ، مەكتەپتەگى جازۋشىنىڭ مۋزەيىن زاماناۋي ۇلگىدە جابدىقتاۋ، مەكتەپ الدىندا ورنالاسقان جازۋشىنىڭ ءبيۋستىن قايتا جاساۋ سىندى بىرقاتار جۇمىستار جوسپارلانعان. قالامگەردىڭ تۋعان اۋىلى – قوستوبە اباتتاندىرىلىپ، ينفراقۇرىلىمى جوندەلەدى. بەردىبەكتەي ءبىرتۋار جازۋشىعا قۇرمەت كورسەتۋ ءىسى تۋعان اۋدانىمەن عانا شەكتەلىپ قالماۋى كەرەك دەپ ويلايمىن. ماسەلەن، قالىڭ بۇقارا قولداپ جاتسا، وبلىستىق كىتاپحاناعا بەردىبەك سوقپاقباەۆ ەسىمىن بەرۋدى ۇسىنامىن. بۇل باستامانى جاۋاپتى مەكەمەلەر جىل سوڭىنا دەيىن جۇزەگە اسىرادى دەپ ۇمىتتەنەمىن»،—دەپ تولىقتىردى سۇلتانعازيۆ.
