بۇرىنعى پرەزيدەنت نۇرسۇلتان نازارباەۆتىڭ جيەنى ءنۇرالى اليەۆكە تيەسىلى «TNS-INTEC» جشس الماتى وبلىسىنداعى سەل قاۋپىن باقىلاۋدىڭ اۆتوماتتاندىرىلعان جۇيەسىنە دە (اسم) جاۋاپتى ەكەنى بەلگىلى بولدى، دەپ حابارلايدى «ادىرنا» ۇلتتىق پورتالى.
«تاپسىرىس بەرۋشى – «قازاقستان رەسپۋبليكاسى توتەنشە جاعدايلار مينيسترلىگى الماتى قالاسىنىڭ توتەنشە جاعدايلار دەپارتامەنتى» مەملەكەتتىك مەكەمەسى; سيپاتتامالارى – الماتى، قارعالى جانە اقساي قالالارىنىڭ كىشى جانە ۇلكەن وزەندەرىنىڭ باسسەيندەرىندەگى سەل قاۋپىن باقىلاۋدىڭ اۆتوماتتاندىرىلعان جۇيەسىنە تەحنيكالىق قىزمەت كورسەتۋ; سوماسى – 46 317 000 تەڭگە»، - دەلىنگەن مەملەكەتتىك ساتىپ الۋ سايتىنداعى شارتتا.
لوت 2023 جىلدىڭ مامىر ايىندا جاريالاندى. ال اتالمىش بايقاۋدى الماتىلىقتاردى جەر سىلكىنىستەرى تۋرالى الدىن الا ەسكەرتۋگە جاۋاپتى جانە بۇل ءۇشىن 1,1 ملرد تەڭگە العان «TNS-INTEC» جشس جەڭىپ الدى.
جابدىقتاۋشى مەن تاپسىرىس بەرۋشى اراسىنداعى اعىمداعى كەلىسىمشارت سول جىلى جاسالعان.
«TNS-INTEC» جشس ەكس-پرەزيدەنت نۇرسۇلتان نازارباەۆتىڭ جيەنى ءنۇرالى اليەۆكە تيەسىلى، دەپ حابارلادى بۇعان دەيىن «ادىلدىك جولى» قوعامدىق بىرلەستىگىنىڭ (ۇەۇ) اتقارۋشى ديرەكتورى ديدار سماعۇلوۆ.
