الماتى تۇرعىندارى مەن قالا قوناقتارى قازاقستاننىڭ بۇرىنعى پرەزيدەنتى نۇرسۇلتان نازارباەۆتىڭ جيەنى ءنۇرالى اليەۆپەن بىرگە گورەلنيك شاتقالىنا بارىپ، تاڭعى اس ىشۋگە مۇمكىندىك الادى. كەزدەسۋ 25 اقپانعا جوسپارلانعان.
قاتىسۋشىلار شاتقالعا جينالىپ، تاڭعى جاتتىعۋ جاساپ، كەيىن سۋعا ءتۇسىپ، تاڭعى اس ءىشۋ بارىسىندا ءبىر-بىرىمەن تانىسادى. قاتىسۋ تەگىن، الايدا بارعىسى كەلەتىندەر الدىن الا ساۋالناما تولتىرۋى قاجەت. وندا جۇمىس ورنى مەن لاۋازىمى كورسەتىلەدى.
كەزدەسۋدى SM's 5 AM Club بىرلەستىگى ۇيىمداستىرادى. بۇل قاۋىمداستىق كۇن سايىن ەرتە تۇرىپ، بەلسەندى ءومىر سالتىن ۇستاناتىن ادامداردى بىرىكتىرەدى.
جۋىردا ميلليونەر ءنۇرالى اليەۆ ادامزاتقا «سانا بيىگىنە جەتۋگە» كومەكتەسەتىن جاڭا قوزعالىس قۇرىپ، ەلدى تاڭعالدىرعان ەدى. قازىر ول ءوزىن تەك كاسىپكەر رەتىندە عانا ەمەس، رۋحاني باعىت-باعدار بەرۋشى تۇلعا رەتىندە دە تانىتىپ ءجۇر. ءنۇرالى اليەۆ بۇل وزگەرىستەردى جاقىن ادامىنان ايىرىلعاننان كەيىنگى وي تولعانىستارىمەن بايلانىستىرادى.
ايتا كەتسەك، Forbes جۋرنالىنىڭ قازاقستانداعى ەڭ باي كاسىپكەرلەر تىزىمىندە ءنۇرالى اليەۆ 39-ورىندا تۇر، ونىڭ بايلىعى 289 ميلليون دوللار دەپ باعالانعان.
