تانىمال قازاقستاندىق جۋرناليست، تەلەجۇرگىزۋشى جانە بلوگەر دينارا ءساتجان رەسەيلىك تەلەجۇرگىزۋشى تينا كاندەلاكيدىڭ ارانداتۋشىلىق جازباسىنا جاۋاپ بەردى، دەپ حابارلايدى “ادىرنا” ۇلتتىق پورتالى.
بۇگىن تينا كاندەلاكي ءوزىنىڭ Telegram-ارناسىندا قازاقستاندا ورىس ءتىلىن مەملەكەتتىك دەڭگەيدەن شەتتەتىپ جاتقانىن ايتىپ، جازبا جاريالادى.
«رەسپۋبليكانىڭ كولىك مينيسترلىگى بىرقاتار تەمىرجول ستانتسيالارىنىڭ اتىن وزگەرتىپ، ورىسشا اتاۋلاردى قازاقشاعا الماستىرعىسى كەلدى. مىسالى، «ۋرالسك» ستانتسياسىن «ورالعا»، «ۋزەن» ستانتسياسىن «جاڭاوزەنگە» اۋىستىردى»، - دەپ جازدى ول.
بۇعان قازاقستاندىق جۋرناليست دينارا ءساتجان ءوز ينستا-پاراقشاسىندا بىلاي دەپ جاۋاپ بەردى: بىرىنشىدەن، ءبىز تاۋەلسىز، ەگەمەن مەملەكەتپىز. ورىستىڭ جاقسى ماقالى بار: «ۆ چۋجوي موناستىر سو سۆويم ۋستاۆوم نە لەزۋت». ال تەمىرجول ۆوكزالىن قالاي اتايتىنىمىزدى ءوزىمىز شەشەيىك. ەكىنشىدەن، قازاقستان تاۋەلسىزدىك العان جىلدار ىشىندە كەڭەس وكىمەتى جىلدارىندا جوعالعان انا ءتىلىن بىرتىندەپ قايتارىپ كەلەدى. ۇشىنشىدەن، ەلىمىزدەگى ۇلتارالىق قاتىناستىڭ رەسمي ءتىلى – ورىس ءتىلى، ال قازاق ءتىلى – مەملەكەتتىك ءتىل”.
سونداي-اق دينارا ءساتجان تەمىرجول ۆوكزالدارى اتاۋلارىنىڭ وزگەرتىلمەي، كەرىسىنشە، بۇل اۋماقتىق اتاۋلارىنىڭ دۇرىس نۇسقاسى ەكەنىن دە اتاپ ءوتتى.
«وعان ورىس ءتىلىن ىعىستىرۋدىڭ قانداي قاتىسى بار؟ ءبىز ءوز ەلىمىزدە مەملەكەتتىك تىلدە عانا ەمەس، ورىس جانە اعىلشىن تىلدەرىندە دە سويلەيمىز. ءبىزدىڭ كۇشىمىز وسىدا!»، - دەپ قوستى جۋرناليست.
ەستەرىڭىزگە سالا كەتەيىك، وتكەن اپتادا كولىك مينيسترلىگىنىڭ قاۋلىسى بويىنشا، ەلىمىزدىڭ بىرقاتار تەمىرجول ۆوكزالدارىنىڭ اتاۋى وزگەرگەن بولاتىن.
“ادىرنا” ۇلتتىق پورتالى
