Tanymal qazaqstandyq jýrnalıst, telejúrgizýshi jáne bloger Dınara Sátjan reseılik telejúrgizýshi Tına Kandelakıdiń arandatýshylyq jazbasyna jaýap berdi, dep habarlaıdy “Adyrna” ulttyq portaly.
Búgin Tına Kandelakı óziniń Telegram-arnasynda Qazaqstanda orys tilin memlekettik deńgeıden shettetip jatqanyn aıtyp, jazba jarııalady.
«Respýblıkanyń Kólik mınıstrligi birqatar temirjol stanııalarynyń atyn ózgertip, oryssha ataýlardy qazaqshaǵa almastyrǵysy keldi. Mysaly, «Ýralsk» stanııasyn «Oralǵa», «Ýzen» stanııasyn «Jańaózenge» aýystyrdy», - dep jazdy ol.
Buǵan qazaqstandyq jýrnalıst Dınara Sátjan óz ınsta-paraqshasynda bylaı dep jaýap berdi: Birinshiden, biz táýelsiz, egemen memleketpiz. Orystyń jaqsy maqaly bar: «V chýjoı monastyr so svoım ýstavom ne lezýt». Al temirjol vokzalyn qalaı ataıtynymyzdy ózimiz shesheıik. Ekinshiden, Qazaqstan táýelsizdik alǵan jyldar ishinde Keńes ókimeti jyldarynda joǵalǵan ana tilin birtindep qaıtaryp keledi. Úshinshiden, elimizdegi ultaralyq qatynastyń resmı tili – orys tili, al qazaq tili – memlekettik til”.
Sondaı-aq Dınara Sátjan temirjol vokzaldary ataýlarynyń ózgertilmeı, kerisinshe, bul aýmaqtyq ataýlarynyń durys nusqasy ekenin de atap ótti.
«Oǵan orys tilin yǵystyrýdyń qandaı qatysy bar? Biz óz elimizde memlekettik tilde ǵana emes, orys jáne aǵylshyn tilderinde de sóıleımiz. Bizdiń kúshimiz osyda!», - dep qosty jýrnalıst.
Esterińizge sala keteıik, ótken aptada Kólik mınıstrliginiń qaýlysy boıynsha, elimizdiń birqatar temirjol vokzaldarynyń ataýy ózgergen bolatyn.
“Adyrna” ulttyq portaly
