پرەزيدەنت قاسىم-جومارت توقاەۆ ورىس ءتىلىن قولداۋ جونىندەگى حالىقارالىق ۇيىم جوباسىن ماقۇلدادى، دەپ حابارلايدى «ادىرنا» ۇلتتىق پورتالى قازتاگ-قا سىلتەمە جاساپ.
«ورىس ءتىلىن قولداۋ جونىندەگى حالىقارالىق ۇيىم جوباسى ماقۇلدانسىن»،- دەلىنگەن توقاەۆتىڭ جارلىعىندا.
قازاقستاننىڭ نورماتيۆتىك اكتىلەر سايتىندا جاريالانعان قۇجاتتا «كەلىسىم مەملەكەتارالىق قاتىناس ءتىلى جانە قارىم-قاتىناس قۇرالى رەتىندە ورىس ءتىلىن ساقتاۋ جانە دامىتۋ ماسەلەلەرى بويىنشا جان-جاقتى ءوزارا ءتيىمدى ىنتىماقتاستىقتى نىعايتۋ ءۇشىن جاعداي جاساۋعا نەگىزدەلگەنى» جازىلعان.
قۇجاتتا ورىس ءتىلى بۇۇ، تمد، ۇجىمدىق قاۋىپسىزدىك شارتى ۇيىمى، ەۋرازيا ەكونوميكا وداعى مەن شانحاي ىنتىماقتاستىق ۇيىمىنىڭ رەسمي ارى/نەمەسە جۇمىس ءتىلى ەكەنى اتاپ كورسەتىلگەن.
«ۇيىمنىڭ ماقساتى: كەلىسىمگە قول قويعان تاراپتار اراسىندا دوستىق، تاتۋ كورشىلىك، ءوزارا تۇسىنىستىك جانە ءوزارا ءتيىمدى ىنتىماقتاستىقتى دامىتۋ جانە نىعايتۋ; مەملەكەتارالىق قاتىناس ءتىلى جانە قارىم-قاتىناس قۇرالى رەتىندە ورىس ءتىلىن ساقتاۋ جانە دامىتۋ ماسەلەلەرى بويىنشا قاتىسۋشى مەملەكەتتەردىڭ جان-جاقتى ءوزارا ءتيىمدى ىنتىماقتاستىعىن نىعايتۋ» دەپ جازىلعان ۇيىم جارعىسىندا.
ۇيىمنىڭ مىندەتتەرىنىڭ ءبىرى رەتىندە «ورىس تىلىندە ءبىلىم بەرۋ ساپاسىن قولداۋ، «ورىس ءتىلى جانە ادەبيەت» جانە «ورىس ءتىلى شەت ءتىلى رەتىندە» باعىتتارى بويىنشا پەداگوگيكا جانە عىلىمي كادرلاردى دايىنداۋعا اتسالىسۋ، سونىمەن بىرگە «ورىس ءتىلى» جانە «ورىس ادەبيەتى» پاندەرىنىڭ وقۋلىقتارى مەن وقۋ نۇسقاۋلىقتارىنا ساراپتاما جۇرگىزۋ بويىنشا تاجىريبە الماسۋ; مەملەكەتارالىق قاتىناس قۇرالى رەتىندە ورىس ءتىلىن قولداۋ جانە تانىمال ەتۋدى كوزدەيتىن شىعارماشىلىق جوبالارعا گرانت بايقاۋلارىن بەكىتۋ» دەپ جازىلعان.
ۇيىمنىڭ مىندەتتەرى:
- ورىس تىلىندە ساپالى ءبىلىم بەرۋدى قولداۋ، «ورىس ءتىلى مەن ادەبيەتى» جانە «ورىس ءتىلى شەت ءتىلى رەتىندە» باعىتتارى بويىنشا پەداگوگيكالىق جانە عىلىمي كادرلاردى دايارلاۋعا جانە ورىس ءتىلىن وقىتۋ سالاسىنداعى مامانداردىڭ كادرلىق رەزەرۆىن قالىپتاستىرۋعا جاردەمدەسۋ;
- ورىس ءتىلى سالاسىنداعى ءبىلىم بەرۋ پروتسەسىنىڭ، عىلىمي زەرتتەۋلەر مەن تەحنولوگيالىق ازىرلەمەلەردىڭ ماتەريالدىق-تەحنيكالىق بازاسىن نىعايتۋعا جاردەمدەسۋ;
- كلاسسيكالىق جانە قازىرگى زامانعى اۆتورلارىنىڭ ادەبي شىعارمالارىن ورىس تىلىنە جانە ورىس تىلىنەن باسقا تىلگە اۋدارۋدى ۇيىمداستىرۋعا جاردەمدەسۋ;
- ورىس ءتىلىن وقىتۋ مەن وقىتۋدىڭ پەرسپەكتيۆالارى مەن باعىتتارىن تالقىلاۋ بويىنشا حالىقارالىق عىلىمي كونفەرەنتسيالار وتكىزۋ;
- حالىقارالىق كىتاپ كورمەلەرىن، ورىس ءتىلى بويىنشا حالىقارالىق ديكتانتتاردى، شەشەندىك ونەر كونكۋرسىن وتكىزۋ;
- «ورىس ءتىلى» جانە «ورىس ادەبيەتى» وقۋ پاندەرى بويىنشا وقۋلىقتار مەن وقۋ قۇرالدارىنا ساراپتاما جۇرگىزۋ بويىنشا تاجىريبە الماسۋدى ۇيىمداستىرۋ;
- ۇلتارالىق قارىم-قاتىناس ءتىلى جانە كوممۋنيكاتسيا قۇرالى رەتىندە ورىس ءتىلىن قولداۋ جانە ناسيحاتتاۋ ماقساتىندا شىعارماشىلىق جوبالاردى ىسكە اسىرۋعا گرانتتار الۋعا كونكۋرستار قۇرۋ.
اتالعان قۇجاتقا قول قويۋى ءتيىس ەلدەر رەتىندە قازاقستان، رەسەي، ازەربايجان، ارمەنيا، بەلارۋس، قىرعىزستان، مولدوۆا، تاجىكستان، وزبەكستان مەن ۋكراينا جازىلعان.
«ادىرنا» ۇلتتىق پورتالى
