راحات تۇرلىحانوۆقا قاتىستى اپەللياتسيالىق سوت ۇكىمى شىقتى

«قۇرمەتتى سوت، مەن سوت وتىرىسىنا جۋرناليستەردىڭ قاتىسۋىنا قارسىمىن. ەگەر مۇمكىندىك بولسا، ولاردى شىعارىپ جىبەرۋىڭىزدى سۇرايمىن»، - دەدى راحات تۇرلىحانوۆ. سۋديا ايىپتالۋشىنىڭ ءوتىنىشىن ماقۇلداپ، سوتتى جابىق رەجيمدە وتكىزۋ تۋرالى شەشىم قابىلدادى. ەسكە سالا كەتەيىك، وتكەن جىلدىڭ جەلتوقسان ايىندا راحات تۇرلىحانوۆ ايەلىن بىرنەشە رەت سوققىعا جىققانى ءۇشىن ايىپتالىپ، سوت اكىمشىلىك ەسكەرتۋ جاساعان بولاتىن. دەگەنمەن 10 قاڭتاردا سوتقا ءىستى قايتا قاراۋ جونىندە اپەللياتسيالىق شاعىم تۇسكەن. وسىعان سايكەس، الماتى قالالىق سوت ۇكىمى بويىنشا، ايىپتالۋشى راحات تۇرلىحانوۆ 10 تاۋلىككە اكىمشىلىك قاماققا الۋ تۇرىندەگى جازاعا تارتىلادى. قاۋلى كۇشىنە ەندى. "وسى ماتەريالدى قاراۋ بارىسىندا، سوت القاسى تاعايىندالعان جازا بويىنشا، بۇرىن جۇبايىنا بىرنەشە رەت قول كوتەرۋ دەرەگى بولۋىنا بايلانىستى ءبىرىنشى ساتىداعى سوت شەشىمىمەن كەلىسپەدى. الماتى سوتى القاسىنىڭ شەشىمى بويىنشا، الماتى اكىمشىلىك قۇقىق بۇزۋشىلىق ىستەرى جونىندەگى مامانداندىرىلعان اۋدانارالىق سوتى شەشىمى وزگەرتىلدى", - دەلىنگەن سوت حابارلاماسىندا.

”ادىرنا” ۇلتتىق پورتالى