ۇجىمدىق قاۋىپسىزدىك شارت ۇيىمىنىڭ باس حاتشىسى ۇقشۇ-نىڭ 2024 جىلعا ارنالعان باسىمدىقتارىن ايتتى، دەپ حابارلايدى «ادىرنا» ءتىلشىسى.
«يمانعالي تاسماعامبەتوۆ قازاقستاننىڭ 2024 جىلى ۇيىمعا توراعالىق ەتۋ كەزەڭىندەگى باسىمدىقتارىنا توقتالدى. ايتۋىنشا، ۇقشۇ ۇجىمدىق قاۋىپسىزدىك كەڭەسىنىڭ 2023 جىلعى قاراشاداعى سەسسياسىنىڭ شەشىمدەرىن ىسكە اسىرۋ قازاقستاننىڭ اسكەري قۇرامداس بولىگىن جەتىلدىرۋ بويىنشا جاڭا كوپقىرلى مىندەتتەردى كوزدەيدى»،—دەلىنگەن ءباسپاسوز حابارلاماسىندا.
ۇقشۇ بىرىككەن شتابىنىڭ باستىعى، گەنەرال-پولكوۆنيك اندرەي سەرديۋكوۆ جىل قورىتىندىسى بويىنشا وتكەن جيىندا 2023 جىلعى ماڭىزدى باعىتتاردىڭ ءبىرى داعدارىسقا قارسى ارەكەت ەتۋ جۇيەسىن جەتىلدىرۋ ەكەنىن مالىمدەدى. گەنەرال-پولكوۆنيكتىڭ سوزىنە سۇيەنسەك، ول 2024 جىلى دا ءوز جالعاسىن تاپپاق. بۇدان بولەك سەرديۋكوۆ بيىلعا ارنالعان باسىم مىندەتتەردىڭ قاتارىندا ۇقشۇ-نىڭ اسكەري قۇرامداس بولىگىن دامىتۋدى رەتتەيتىن نورماتيۆتىك قۇقىقتىق بازانى جەتىلدىرۋ، ۇيىم حاتشىلىعىمەن جانە قورعانىس ۆەدومستۆولارىمەن بىرلەسىپ جۇمىستى جالعاستىرۋ، جوعارى ساپالى دايىندىقتى ۇيىمداستىرۋ بار ەكەنىن اتاپ ءوتتى.
ايتا كەتەيىك، بۇعان دەيىن قازاقستاننىڭ ۇقشۇ-عا توراعالىعى باستالعانىن جازعان ەدىك.
